რუსმა ჰაკერებმა უკრაინული გაზის კომპანია ბურიზმას შეუტიეს, რომელიც ტრამპის იმპიჩმენტთან, ჯო ბაიდენთან და მის შვილთან, ჰანტერ ბაიდენთანაა დაკავშირებული. ინფორმაცია ამის შესახებ New York Times-მა გაავრცელა.

კიბერთავდასხმების სერია კომპანია ბურიზმაზე, რომლის სამეთვალყურეო საბჭოს წევრიც ჰანტერ ბაიდენი იყო, ნოემბრის დასაწყისში დაიწყო. სწორედ ამ დროს აშშ-ში ყველა გამოცემა ტრამპისა და უკრაინის სკანდალზე წერდა.

ჯერჯერობით უცნობია, რას ეძებდნენ ჰაკერები ან რა ინფორმაცია მოიპოვეს, თუმცა ექსპერტების თქმით, რუსები, სავარაუდოდ, ბაიდენის წინააღმდეგ კომპრომატების შეგროვებაზე მუშაობდნენ.

გამოყენებული ტაქტიკა ჰგავდა ჰილარი კლინტონის ელ-ფოსტის დაჰაკვის პროცესს: რუსმა ჰაკერებმა, რომლებიც სამხედრო დაზვერვის დანაყოფ G.R.U-ს წარმოადგენენ, ე.წ. ფიშინგით და ნამდვილთან მიმსგავსებული ვებგვერდებით კომპანიის თანამშრომლების მონაცემები მოიპოვეს, შემდეგ კი ერთ-ერთი სერვერი გატეხეს.

რამდენიმე თვის წინ ამერიკის ეროვნული უსაფრთხოების სააგენტომ და ბრიტანეთის მსგავსმა ორგანომ განცხადება გაავრცელეს. მათი თქმით, რუსი ჰაკერები 2020 წელს კიდევ უფრო დიდ საფრთხეს წარმოადგენენ და, შესაძლოა, არჩევნების წინ კვლავაც გააქტიურდნენ.

ამავე თემაზე: