Star Wars-ის მსახიობმა მარკ ჰემილმა ფეისბუქის ანგარიში წაშალა და კომპანიას და მის CEO-ს პოლიტიკური რეკლამების გამო უსაყვედურა.

"ძალიან იმედგაცრუებული ვარ, რომ მარკ ცუკერბერგისთვის სიმართლეზე მნიშვნელოვანი ფულია. ამიტომ გადავწყვიტე ჩემი ფეისბუქის წაშლა. ვიცი, რომ სამყაროსთვის ეს მნიშვნელოვანი ამბავი არაა, მაგრამ ღამით უფრო მშვიდად დავიძინებ. პატრიოტიზმი ფულზე მაღლა დგას", — დატვიტა მან.

მსახიობის ტვიტი არც ისე უმნიშვნელო აღმოჩნდა, მას 170 ათასზე მეტი მოწონება აქვს. ჰემილის უკმაყოფილება ფეისბუქის იმ გადაწყვეტილებას მოჰყვა, რომლის მიხედვითაც, სოციალური ქსელი განაგრძობს პოლიტიკური რეკლამების განთავსებას, იმის მიუხედავად, რომ ისინი, შესაძლოა, ტყუილსაც შეიცავდეს.

ამ თემაზე ვრცელი სტატია თავდაპირველად ნიუ-იორკ თაიმსმა გამოაქვეყნა, რომელსაც გასულ კვირაში ფეისბუქის ვიცე-პრეზიდენტი ენდრიუ ბოსვორთი გამოეხმაურა. მისი თქმით, 2016 წელს ტრამპის გაპრეზიდენტებაზე პასუხისმგებლობა ფეისბუქზე გავრცელებულ რეკლამებს ეკისრება. ბოსვორთი დასძენს, რომ წელს, შესაძლოა, იგივე განმეორდეს, თუმცა შედეგის ასარიდებლად პროცესებში "ხელოვნურად ჩარევას" არ აპირებს:

"როგორ ლიბერალმა, მე მინდა ყველაფერი ვცადო, რომ იგივე შედეგი თავიდან ავირიდო", — ამბობს ის, თუმცა ამატებს, რომ ამ პროცესში ხელოვნურად ჩარევა მისთვის მიუღებელია, — "რაოდენ მაცდურიც არ უნდა იყოს ამ შედეგის თავიდან ასარიდებლად ჩვენს ხელთ არსებული მექანიზმების გამოყენების სურვილი, მე ღრმად მჯერა, რომ ჩვენ ეს არასდროს არ უნდა გავაკეთოთ, რადგან ამ შემთხვევაში გავხდებით ის, რისიც თავად გვეშინია".

იგივე პრობლემის თავიდან ასარიდებლად, გასულ წელს ტვიტერმა პლატფორმაზე პოლიტიკური რეკლამები სრულად აკრძალა.