ექიმ ალექს კარევს გრეის ანატომიაში ვეღარ ვიხილავთ. მსახიობმა ჯასტინ ჩემბერსმა 15 წლის შემდეგ სერიალის დატოვება გადაწყვიტა. მისი გმირი ბოლოს გრეის ანატომიის 350-ე ეპიზოდში გამოჩნდა, რომელიც ეთერში 14 ნოემბერს გავიდა.

"არ არსებობს კარგი დრო იმ შოუსთან და პერსონაჟთან დამშვიდობებისათვის, რომელმაც ჩემი ცხოვრება ბოლო 15 წლის განმავლობაში განსაზღვრა", - თქვა ჩემბერსმა Deadline-თან საუბარში, - "თუმცა, ახლა იმედი მაქვს, რომ თავს სხვადასხვა როლში მოვსინჯავ და ჩემს კარიერასაც მრავალფეროვნებას შევძენ. ახლა, როცა 50 წლის გავხდი და არაჩვეულებრივი მეუღლე და ხუთი საოცარი ბავშვი მყავს, ვფიქრობ, რომ დროა".

ჩემბერსმა მადლობა გადაუხადა ABC-ს, სერიალის შემქმნელ შონდა რაიმსს და იმ სამ მსახიობს, რომლებიც მის გვერდით სერიალის პირველი სეზონიდან იყვნენ: ელენ პომპეოს (მერედიტი), ჩანდრა უილსონსა (მირანდა ბეილი) და ჯეიმზ პიკენს უმცროსს (რიჩარდ უებერი).

რა თქმა უნდა, ჩემბერსს არც ფანები გამორჩენია.

ალექს კარევი მაყურებლებმა ბოლოს 14 ნოემბრის ეპიზოდში ნახეს, როცა მან საავადმყოფო ავადმყოფი დედის მოსავლელად დატოვა. ჩემბერსის გმირი შემოდგომის სეზონის ფინალში აღარ გამოჩენილა.

გრეის ანატომიის პრემიერა ABC-ის ეთერში 2005 წლის 27 მარტს შედგა.