And Then We Danced-ის მსახიობი ლევან გელბახიანი იმ 10 ახალგაზრდა ევროპელ მსახიობს შორის მოხვდა, რომლებიც ბერლინის კინოფესტივალზე ამომავალი ვარსკვლავის ტიტულით წარდგებიან. ინფორმაციას Variety ავრცელებს.

ამომავალი ვარსკვლავები ევროპის ფილმის პრომუშენმა (EFP) გამოავლინა. მათ შორის არიან საფრანგეთის, შვეიცარიის, დანიის, ესტონეთის და სხვა ქვეყნების წარმომადგენლები. პოლონეთიდან სიაში მსახიობი ბართოშ ბიელენია მოხვდა, რომლის მონაწილეობითაც ფილმი Corpus Christi ოსკარის უცხოენოვანი ფილმების შორთლისტშია.

ამომავალი ვარსკვლავების სიაში გასულ წლებში მოხვდნენ მომავალში ისეთი წარმატებული მსახიობები, როგორებიც არიან ბონდის როლის შემსრულებელი დენიელ კრეიგი (2000), ქერი მულიგანი (2009), Dark-ის მსახიობი ლუის ჰოფმანი (2017) და ალისია ვიკანდერი (2011).

ლევან გელბახიანისთვის ლევან აკინის ფილმში და ჩვენ ვიცეკვეთ როლი სადებიუტოა, თუმცა გეი დრამაში განსახიერებულმა მერაბმა მას დიდი წარმატება და საერთაშორისო აღიარება მოუტანა.

ბერლინალე 20 თებერვლიდან პირველ მარტამდე გაიმართება.