Air France-ის თვითმფრინავის შასის განყოფილებაში ბავშვის ცხედარი იპოვეს. ფრანგული პრესა წყაროზე დაყრდნობით წერს, რომ ბავშვი 10 წლის იყო. გამოძიება უკვე დაწყებულია. საფრანგეთის პოლიციაში BBC-ს უთხრეს, რომ გარდაცვლილი ბიჭი აფრიკული წარმომავლობისაა.

თვითმფრინავი აფრიკიდან, კოტ-დ’ივუარის რესპუბლიკის ქალაქ აბიჯანიდან 7 იანვარს გამოფრინდა. ფრანგული ავიაკომპანიის განცხადებით, ცხედარი იმავე დღეს პარიზში, შარლ დე გოლის სახელობის აეროპორტში აღმოაჩინეს.

"ავიაკომპანია მწუხარებას გამოთქვამს და გლოვობს ადამიანური ტრაგედიის გამო", — ნათქვამია ავიაკომპანიის ტვიტში.

თვითმფრინავში დამალვის მსგავსი შემთხვევები ხშირად არ ხდება, თუმცა დაბალი ტემპერატურისა და ჟანგბადის უკმარისობის პირობებში გადარჩენა, ფაქტობრივად, შეუძლებელია.

2019 წელს ლონდონში Kenya Airways-ის თვითმფრინავის შასის განყოფილებიდან კაცის ცხედარი ჩამოვარდა და ერთ-ერთი მაცხოვრებლის ეზოში დავარდა. 2015-ში რიჩმონდში ერთ-ერთი შენობის სახურავზე იპოვეს კაცის ცხედარი, რომელიც იოჰანესბურგიდან მომავალი თვითმფრინავიდან ჩამოვარდა.