სამანტა ბარბეში, რომლის შთაგონებითაც შეიქმნა 2019 წელს გამოსულ ფილმ Hustlers-ში ჯენიფერ ლოპესის პერსონაჟი, ფილმის დისტრიბუტორ კომპანია STXfilms-სა და პროდიუსერებს სასამართლოში უჩივის.

მისი აზრით, ფილმის შემქმნელებმა მისი პროტოტიპი უკანონოდ გამოიყენეს ფილმში და თანაც არასწორი ინტერპრეტაციით წარმოადგინეს, რის გამოც ზიანის ასანაზღაურებლად 40 მილიონ დოლარს ითხოვს.

Hustlers რეჟისორ ლორენ სკაფარიას კომედიური ჟანრის კრიმინალური ფილმია, რომელიც New York Magazine-ში 2015 წელს გამოქვეყნებული სტატიის მიხედვით გადაიღეს. სტატიაც და ფილმიც სტრიპტიზის მოცეკვავე ქალების შესახებ მოგვითხრობს, რომლებიც თავიანთ კლიენტებს სხვადასხვა საშუალებით ძარცვავდნენ.

ამ საქმესთან დაკავშირებით სამანტა ბარბეშმა ხუთწლიანი პირობითი სასჯელი მოიხადა — დანაშაულებრივი შეთქმულების, ფიზიკური შეურაცხყოფისა და დიდი რაოდენობის თანხის მოპარვის გამო.

სამანტა ბარბეშის დაკავება 2014 წელს.

ფოტო: AP

ბარბეშის განცხადებით, ფილმზე მუშაობისას მას პროდიუსერები დაუკავშირდნენ და მისგან უფლებების ყიდვა შესთავაზეს, თუმცა ის ამ შეთავაზებას არ დათანხმდა, რადგან სანაცვლოდ მეტისმეტად უმნიშვნელო თანხის გადახდას ჰპირდებოდნენ.

სამანტა ბარბეშის ადვოკატმა ჟურნალ Rolling Stone-ს განუცხადა, რომ მისი კლიენტი "თავს შეურაცხყოფილად გრძნობს, რადგან ფილმის შემქმნელებმა მისი პიროვნება $150 მილიონის გამოსამუშავებლად გამოიყენეს და მისგან უფლებების ყიდვას მანამდე მხოლოდ $6 000-ის სანაცვლოდ ცდილობდნენ".

ფილმის დისტრიბუტორ კომპანია STXfilms-ის განცხადებით კი, ისინი საჭიროების შემთხვევაში დაიცავენ თავიანთ უფლებას, რომ "გადმოსცენ ის ისტორიები, რომლებიც საჯარო ინფორმაციას ეყრდნობა".

აღსანიშნავია, რომ ფილმ Hustlers-ში სამანტა ბარბეშის პროტოტიპის შესრულებისთვის მომღერალი და მსახიობი ჯენიფერ ლოპესი ოქროს გლობუსზე ქალის საუკეთესო როლის ნომინაციაში იყო წარდგენილი.