თავისუფალი დემოკრატების წევრი ლევან სამუშია მაესტროს გადაცემა ღამის კონტაქტში ყოფილ თანაგუნდელებს ოცნების მხარდაჭერის გამო აკრიტიკებს:

"როდესაც აღიარებ და მხარს უჭერ იმ ხელისუფლებას, რომელმაც სააკაშვილის სასამართლო დაგვასვა თავზე და ადამიანის უფლებების დასაცავად არაფერი გაუკეთებია, რომელსაც ჰყავს 5 პოლიტპატიმარი, ვგულისხმობ კაბელების საქმეზე დაკავებულებს, ეს არის არასერიოზული".

სამუშიას განცხადებით, იმ პირებს, რომლებსაც ადამიანის უფლებების ევროპული სასამართლო სამართლიანად აკრიტიკებდა, ქართული ოცნების დახმარებით დღეს მომეტებული ძალაუფლება აქვთ.

თავისუფალი დემოკრატების წევრის თქმით, ქართული ოცნების მმართველობის პირობებში დემოკრატიის ხარისხი დაეცა ქვეყანაში და მათ არცერთი დანაპირები შეასრულეს.

ის მიიჩნევს, რომ ქართული ოცნების ხელში კონსტიტუციური უმრავლესობა ისეთივე საფრთხის შემცველია, როგორც, მისი თქმით, ეს ნაციონალური მოძრაობის დროს იყო, ამიტომ ემიჯნება ყოფილი თანაგუნდელების მხრიდან აღნიშნული პარტიისთვის მხარდაჭერის გამოცხადებას.

ლევან სამუშია აცხადებს, რომ თავისუფალი დემოკრატები არჩევნების მეორე ტურამდე ჩავლენ ჭიათურაში და თავის კანდიდატს მხარდაჭერას გამოუცხადებენ.

დღეს გამართულ ბრიფინგზე, თავისუფალი დემოკრატების ყოფილმა წევრებმა, დავით ონოფრიშვილმა და ზურაბ აბაშიძემ, არჩევნების მეორე ტურზე, მათ ამომრჩეველს ქართული ოცნების მხარდაჭერისკენ მოუწოდეს.