თავისუფალი დემოკრატების ყოფილმა წევრებმა დღეს გამართულ საგანგებო ბრიფინგზე მხარდაჭერა მმართველ გუნდს გამოუცხადეს.

ბრიფინგზე დავით ონოფრიშვილმა აღნიშნა, რომ პოლიტიკაში ჩართვას აღარ აპირებს. მისი განცხადებით გულდასაწყვეტია, რომ საზოგადოებამ ორპოლუსიანი პარლამენტი არჩია და მხარი არ დაუჭირა მესამე ძალას, თავისუფალ დემოკრატებს. ონოფრიშვილმა არჩევნების მეორე ტურზე, მათ ამომრჩეველს ქართული ოცნების მხარდაჭერისკენ მოუწოდა.

"მეორე ტური იწყება, იქნება მალე რამდენიმე დღეში და რეალობა გახლავთ, რომ არის პრაქტიკულად ყველგან დარჩენილი ორი პარტიის კანდიდატები, ქართული ოცნების და ნაციონალური მოძრაობის. ამიტომ მე, ჩემს მხარდამჭერებს, თანამოაზრეებს მოვუწოდებ, რომ აქ ალტერნატივა ნამდვილად არ არსებობს და მოგიწოდებთ, რომ მხარი დაუჭიროთ ქართული ოცნების კანდიდატებს. რადგანაც ჩემთვის პირადად მიუღებელია, რა მიზეზითაც, რა საფუძველზეც ან რის გამოც შეიძლება მხარი არ დაეჭიროს ქართულ ოცნებას, როდესაც ჩვენ ყველამ ერთად, მოსახლეობის დიდმა ნაწილმა, 2012 წელს ერთად მივიღეთ ის გადაწყვეტილება, რომ ნაციონალური მოძრაობა სამუდამოდ უნდა წასულიყო მინიმუმ ოპოზიციაში და შეიძლება პოლიტიკიდანაც."

დავით ონოფრიშვილმა ასევე მოუწოდა მხარდამჭერებს ჭიათურაში მათ კანდიდატს, თემურ გაფრინდაშვილს დაუჭირონ მხარი.

არჩევნების მეორე ტური 30 ოქტომბერს, 50 მაჟორიტარულ ოლქში გაიმართება.