გამოცემა Reuters წყაროზე დაყრდნობით წერს, რომ აშშ-მ ირანის საგარეო საქმეთა მინისტრს, მუჰამედ ჯავად ზარიფს გაეროში ჩასასვლელად ვიზა არ მისცა. ზარიფი უშიშროების საბჭოს სხდომას უნდა დასწრებოდა.

როგორც წყარო გამოცემას ეუბნება, ვიზაზე უარის თქმის მიზეზი ირანსა და აშშ-ს შორის დაძაბული ურთიერთობა გახდა.

გაეროს შეთანხმების მიხედვით, აშშ ვალდებულია, უცხოელი დიპლომატებისთვის ორგანიზაციაზე წვდომა უზრუნველყოს. ამავე დროს, კი ვაშინგტონი განმარტავს, რომ უფლება აქვს უსაფრთხოებისა და ტერორიზმის საფრთხის გამო დიპლომატს ვიზაზე უარი უთხრას.

აშშ-ს სახელმწიფო დეპარტამენტმა და გაეროს პრესსპიკერმა კომენტარის გაკეთებაზე უარი განაცხადეს. გაეროში ირანის მისია კი აცხადებს, რომ ისინი მხოლოდ მედიაში გავრცელებულ ინფორმაციას იცნობენ და ოფიციალური განცხადება აშშ-სგან ან გაეროსგან ჯერ არ მიუღიათ.

ზარიფის ჩასვლა გაეროში მანამდე იყო დაგეგმილი, ვიდრე აშშ ირანელ გენერალს, ყასემ სოლეიმანს საჰაერო თავდასხმის შედეგად მოკლავდა. უშიშროების საბჭოს სხდომა 9 იანვარსაა ჩანიშნული. ბოლოს ირანის საგარეო საქმეთა მინისტრი გაეროში სექტემბერში ჩავიდა.

ახლო აღმოსავლეთში სიტუაცია მას შემდეგ დაიძაბა, რაც 3 იანვარს, აშშ-მ ბაღდადის აეროპორტზე საჰაერო შეტევის დროს ირანის ისლამური რევოლუციის გუშაგთა კორპუსის ქვედანაყოფის, "ქუდსის ძალების" ლიდერი, გენერალი ყასემ სოლეიმანი მოკლა.

ირანის ლიდერმა, აიათოლა ალი ხამენეიმ მომხდარზე თქვა, რომ "სასტიკი შურისძიება ელით მათ, ვინც ამ კრიმინალის უკან დგას". მან ირანში 3-დღიანი გლოვა გამოაცხადა.

გენერალი სულეიმანი ირანის რეჟიმის მთავარი ფიგურა იყო. მის "ქუდსის ძალებს" აშშ ტერორისტებად მოიაზრებდა, რომელებიც ასობით ამერიკელის სიკვდილზე იყვნენ პასუხისმგებელნი.