პირველი პრეზიდენტის შვილი, გიორგი გამსახურდია ძმის, ცოტნე გამსახურდიას მკურნალობაში დახმარებისთვის მადლობა უხდის პრემიერ-მინისტრ გიორგი გახარიასა და ქართული ოცნების თავმჯდომარეს, ბიძინა ივანიშვილს. ამის შესახებ მან ტვიტერზე დაპოსტა.

როგორც გიორგი გამსახურდია აღნიშნავს, მისი ძმის თურქეთში გადაყვანასა და მკურნალობას ფონდი ქართუ აფინანსებს.

"ოჯახის სახელით მინდა, მადლობა გადავუხადო პირადად ბატონ ბიძინა ივანიშვილს და პრემიერ გიორგი გახარიას (რომელთანაც ახლო და მეგობრული ურთიერთობა მაკავშირებს). ასევე, მადლობა მინდა გადავუხადო საქართველოს მთავრობის ადმინისტრაციას, შსს-სა და სუს-ის ხელმძღვანელობას, ჯანდაცვის სამინისტროს და ამ პროცესში ჩართულ ყველა პირს (ვამაყობ, რომ ამ პროცესში ჩართული პირების დიდი ნაწილი ჩემი უახლოესი მეგობარია)", — ნათქვამია გიორგი გამსახურდიას წერილში.

საქართველოს პირველი პრეზიდენტის, ზვიად გამსახურდიას შვილი, ცოტნე გამსახურდია 19 დეკემბრის საღამოს დაჭრეს. შემთხვევა თბილისში, ვერაზე მოხდა. ინციდენტის შემდეგ ცოტნე გამსახურდიას გულმკერდის არესა და თავის ტვინზე ორი ოპერაცია ჩაუტარდა.

გამსახურდიას განზრახ მკვლელობის მცდელობის ბრალდებით დააკავეს ორი პირი, ხოლო დანაშაულის შეუტყობინებლობის ბრალდებით სამი პირი. მათგან ოთხს აღკვეთი ღონისძიების სახით პატიმრობა შეეფარდა.