წლის მიწურულს ტრადიციულად ბევრი ჩვენგანი ცდილობს გასული წელი შეაჯამოს და ყველა ის მნიშვნელოვანი პირადი, პოლიტიკური თუ კულტურული მოვლენა გაიხსენოს, რომელიც მას გასული წლიდან განსაკუთრებულად დაამახსოვრდა.

ამ ტენდენციას არც აშშ-ს ყოფილი პრეზიდენტი, ბარაკ ობამა ჩამორჩა და 2019 წლის ფავორიტი ფილმები და სერიალები დაასახელა.

ამ ცნობილმა პოლიტიკოსმა პირველად 2015 წელს გამოაქვეყნა ფავორიტი წიგნების სია, მას შემდეგ კი წიგნებთან ერთად ხელოვნების სხვადასხვა დარგის რჩეული ნამუშევრების შესახებ თავის შთაბეჭდილებებს ყოველწლიურად საჯაროდ აზიარებს.

გამონაკლისი არც წელს ყოფილა და ბარაკ ობამამ 2019 წელს წაკითხული წიგნებიდან ფავორიტების დაასახელა. მათ შორის მოხვდა ბუკერის ლიტერატურული პრემიის წლევანდელი გამარჯვებული ავტორის, ბერნარდინ ევარისტოს რომანი Girl, Woman, Other.

ტვიტერის საშუალებით აშშ-ს 44-ე პრეზიდენტმა რჩეული ფილმები და სერიალებიც დაასახელა. აღსანიშნავია, რომ მის ფავორიტ ფილმებს შორის მოხვდა სამხრეთ კორეელი რეჟისორის, ბონგ ჯუნ ჰოს პარაზიტი, მარტინ სკორსეზეს ირლანდიელი და გრეტა გერვიგის პატარა ქალები.

როგორც ჩანს, ბარაკ ობამა სატელევიზიო შოუების აქტიური მაყურებელიცაა და მის რჩეულ სერიალებს შორის მოხვდა გასული წლის ისეთი გახმაურებული პროექტები, როგორებიცაა Fleabag, Unbelievable და Watchmen.