სულ ცოტა ხნის წინ, 14 ოქტომბერს ლონდონში გამართულ დაჯილდოებაზე ბუკერის პრემიის 2019 წლის საუკეთესო რომანები გამოავლინეს: მარგარეტ ეტვუდის The Testaments და ბერნარდინ ევარისტოს Girl, Woman, Other.

ბუკერის პრემიის 51 წლიანი ისტორიის განმავლობაში ეს მესამე შემთხვევაა, როცა პრიზი ერთდროულად ორ ავტორს გადაეცა. მანამდე მსგავსი რამ მხოლოდ 1974 და 1992 წლებში განმეორდა.

წელს ფინალში ექვსი ნაწარმოები მოხვდა და შესაბამისად, ექვსი ავტორი იბრძოდა გამარჯვებისთვის: მარგარეტ ეტვუდის The Testaments, ლუსი ელმენის Ducks, Newburyport, ბერნარდინ ევარისტოს Girl, Woman, Other, ჩიგოზი ობიომას An Orchestra of Minorities, სალმან რუშდის Quichotte და ელიფ შაფაქის 10 Minutes 38 Seconds in This Strange World.

მარგარეტ ეტვუდი ცნობილი კანადელი მწერალია, რომელსაც უკვე მეორედ გადაეცა ბუკერის პრემია. პირველად მან 2000 წელს გაიმარჯვა რომანით ბრმა მკვლელი. The Testaments ეტვუდის 1985 წელს დაწერილი ასევე ძალიან ცნობილი და აღიარებული ნაწარმოების, მხევლის წიგნის გაგრძელებაა, რომელიც სულ რამდნემე კვირის წინ გამოქვეყნდა.

ბერნარდინ ევარისტო კი ბრიტანელი მწერალია, რომელიც არაერთი მოთხრობის, პიესისა და ლექსის ავტორია. მისი ბოლო რომანი Girl, Woman, Other თორმეტი შავკანიანი ქალის ისტორიას მოგვითხრობს. ევარისტო პირველი შავკანიანი ქალი გახდა, ვისაც ეს პრიზი გადაეცა.

ფოტო: Booker Prize

წლევანდელი გამარჯვებული ხუთი წევრისგან შემდგარმა სპეციალურმა ჟიურიმ გამოავლიანა. ფინალში მოხვედრილ თითოეულ ავტორს 2 500 ფუნტი სტერლინგი გადაეცემა, გამარჯვებულის პრიზი კი 50 000 ფუნტ სტერლინგს შეადგენს, რაც თითქმის 63 000 დოლარის ტოლფასია. წელს კი რახან ორმა ავტორმა გაიმარჯვა, მათ პრიზის თანაბრად გაყოფა მოუწევთ.

ფულად ჯილდოსთან ერთად ბუკერის პრემია ლიტერატურულ სამყაროში მნიშვნელოვანი აღიარებისა და წიგნის წარმატებული გაყიდვების საწინდარია. მაგალითად, როცა შარშან ირლანდიელმა მწერალმა, ანა ბერნსმა გაიმარჯვა რომანით Milkman, ამ წიგნის გაყიდვებმა შემდეგ კვირაში 880%-ით მოიმატა - მანამდე საშუალოდ გაყიდული 963 ეგზემპლარის მაჩვენებელმა 9,446 ცალს მიაღწია.

ბუკერის პრემია

ბუკერის პრემია ინგლისურენოვანი ლიტერატურის ერთ-ერთი ყველაზე პრესტიჟული ჯილდოა. მას შარშან საიუბილეო 50 წელი შეუსრულდა.

ბუკერის პრემიის გამარჯვებული სხვადასხვა დროს გამხდარან ისეთი ცნობილი მწერლები, როგორებიც არიან ჯულიან ბარნსი, ჯონ ბენვილი, არუნდატი როი და იან მაკიუენი. მათ შორის ბუკერის პრემიის ოთხი მფლობელი — უილიამ გოლდინგი, ნადინ გორდიმერი, ვ. ნაიპოლი და ჯონ მაქსველ კუტზეე შემდგომ ლიტერატურის დარგში ნობელის პრემიის ლაურეატები გახდნენ. 1999 წელს კუტზეე პირველი მწერალი გახდა, რომელმაც ბუკერის პრემია ორჯერ მოიპოვა. ორ წელიწადში ეს მიღწევა გაიმეორა ავსტრალიელმა მწერალმა პიტერ კერიმ. 2019 წელს კი ეტვუდი გახდა მესამე ავტორი, რომელმაც ეს მნიშვნელოვანი პრემია მეორედ მიიღო.

ასევე იხილეთ: