შინაგან საქმეთა სამინისტროს ინფორმაციით, საქართველოში ნარკოტიკებს საერთაშორისო სქემით ყიდდნენ.

შსს-ს ცენტრალური კრიმინალური პოლიციის დეპარტამენტის ცნობით, საქართველოში ნარკოტიკული საშუალებების უკანონო დამზადება, შეძენა, შენახვისა და რეალიზაციის ბრალდებით დაკავებულია საქართველოში მოქმედი ორგანიზებული დანაშაულებრივი ჯგუფის 6 წევრი — საქართველოს 1 და უცხო ქვეყნის 5 მოქალაქე.

სამინისტროს ცნობით, სამართალდამცველებმა თბილისში, ქუთაისსა და ბათუმში, ბრალდებულების საცხოვრებელი სახლებისა და სამალავების ჩხრეკისას 21 კილოგრამამდე ფხვნილისა და 10 ლიტრამდე სითხის სახით ნარკოტიკული საშუალება ამოიღეს. ამავე ინფორმაციის თანახმად, ამოღებულია ნარკოტიკული საშუალების დასამზადებლად საჭირო ლაბორატორიული ინვენტარი და სხვადასხვა სახის ქიმიური ნივთიერება. შსს-ს ცნობით, ამოღებული ნარკოტიკების საბაზრო ღირებულება შავ ბაზარზე 6 მილიონამდე ლარს შეადგენს.

ინფორმაციის თანახმად, ორგანიზებული დაჯგუფება ინტერნეტ აპლიკაციის გამოყენებით ახდენდა ნარკოტიკული საშუალებების უკანონო რეალიზაციას სომხეთში, ყირგიზეთში, უზბეკეთში, ტაჯიკეთსა და საქართველოში.

ორგანიზებული ჯგუფის მიერ ნარკოტიკული საშუალების უკანონო დამზადების, შეძენა-შენახვისა და ნარკოტიკული საშუალების უკანონოდ გასაღების საქმეზე გამოძიება სისხლის სამართლის კოდექსის 260-ე მუხლის 1-ლი და 3-ე ნაწილის "ა" ქვეპუნქტით, ამავე მუხლის მე-6 ნაწილის "ბ" ქვეპუნქტით, 19-260-ე მუხლის მე-4 ნაწილით, 19-260-ე მუხლის მე-6 ნაწილის ,"ბ" ქვეპუნქტით და 266-ე მუხლის 1-ლი ნაწილით მიმდინარეობას.