საქართველოს მთავრობის ადმინისტრაციის ინფორმაციით, შინაგან საქმეთა სამინისტროს თბილისის მასშტაბით არასრულწლოვანთა სამმართველო ექნება. როგორც უწყების მიერ გავრცელებულ პრესრელიზში ვკითხულობთ, ამ საკითხზე უწყებათაშორისი სამუშაო ჯგუფის შეხვედრაზე შეთანხმდნენ.

საქართველოს მთავრობის ადმინისტრაციის ხელმძღვანელის, ნათია მეზვრიშვილის თქმით, არასრულწლოვანთა სამმართველო 2020 წლის პირველი აპრილიდან ამუშავდება.

"[იქ] იმუშავებენ არასრულწლოვნებზე სპეციალიზებული გამომძიებლები და ამ მიმართულებით შესაბამისი გადამზადება მენეჯმენტსაც გავლილი ექნება", — აღნიშნა მან.

მისივე თქმით, არსებობდა ინფრასტრუქტურული პრობლემები, რომელიც მოგვარდა:

"შევთანხმდით, რომ სამმართველო აღჭურვილი იქნება შესაბამისი ვიდეოკამერებით, რომელიც ასახავს სრულ პროცესს სამმართველოში არასრულწლოვნის შესვლიდან გასვლამდე".

რამდენიმე დღის წინ 15 წლის მოზარდმა, ლუკა სირაძემ პოლიციაში დაკითხვის შემდეგ თვითმკველეობა სცადა. ამ საკითხზე სახელმწიფო ინსპექტორის აპარატმა საქმის გამომძიებელი დააკავა.