"ეკონომიკა უნდა იყოს მაქსიმალურად თავისუფალი სახელმწიფოს ჩარევისგან და ის უნდა ეფუძნებოდეს თავისუფალი ბაზრის პრინციპებს", — ეს იყო ერთ-ერთი მესიჯი მამუკა ხაზარაძის სიტყვიდან, რომელიც მან პარტიის დამფუძნებელ ყრილობაზე წარმოთქვა. დღეს, 22 დეკემბერს პოლიტიკური გაერთიანება ლელო საქართველოსთვის ოფიციალურად დააფუძნეს.

მამუკა ხაზარაძის თქმით, მათი მიზანი იქნება უახლოეს წლებში 20 მილიარდი დოლარის ინვესტიციის მოზიდვა:

"და ეს რიცხვი რეალურია! ჩვენმა ჯგუფმა ბიზნეს სექტორში ბოლო წლების მანძილზე 2 მილიარდ დოლარამდე ინვესტიციის მოზიდვა შეძლო. გარწმუნებთ, რომ ქვეყნის მასშტაბით და სწორი პოლიტიკის გატარებით ეს შესაძლებელია! თუ ვიფიქრებთ და ვიმოქმედებთ მასშტაბურად".

ლელოს პოლიტიკური გეგმა

გეგმის წარდგენისას მამუკა ხაზარაძემ პირველ პუნქტად გაწერა "სასამართლო სისტემის სრული განახლება". იგი ამბობს, რომ ხელისუფლებაში მოსვლის პირველივე წუთიდან გაათავისუფლებს სასამართლო სისტემას პოლიტიკური წნეხისგან, ხოლო 6 თვის თავზე საერთაშორისო სტანდარტების შესაბამის სასამართლო რეფორმას გაატარებს.

"ქვეყანა უნდა ვაქციოთ რეგიონის ფინანსურ ცენტრად. საქართველოში უნდა ავამოქმედოთ საერთაშორისო საფონდო ბირჟა. ეს შეიძლება მოხდეს ნიუ-იორკის, ჰონგ-კონგის ან ლონდონის ბირჟების მონაწილეობით, სადაც აქტიურად განხორციელდება ადგილობრივი და საერთაშორისო კომპანიების აქციებით ვაჭრობა", — აგრძელებს მამუკა ხაზარაძე და ამბობს, რომ ასეთი ბირჟის გახსნა შესაძლებელია უფუნქციოდ დატოვებული ქუთაისის პარლამენტის შენობაში.

მისივე განცხადებით, ქუთაისის საერთაშორისო აეროპორტის გარშემო უნდა შეიქმნას მძლავრი ლოჯისტიკური ცენტრი, სადაც იმუშავებს ისეთი ტიპის უზარმაზარი კომპანიები , როგორიცაა ამაზონი, ალიბაბა, ფედექსი და სხვა. ისინი ამ წერტილიდან - ფრენის 3 საათის რადიუსში შეძლებენ დაფარონ ნახევარ მილიარდზე მეტი მოსახლეობის მქონე ბაზარი.

მამუკა ხაზარაძემ ისაუბრა იმაზეც, რომ ევროატლანტიკური სივრცე არის საქართველოს ცივილიზებული არჩევანი და რომ დასავლური ორიენტაცია იწყება სახელმწიფოს შიგნით რეფორმებით.

ხაზარაძემ კვლავ ხაზგასმით თქვა, რომ ანაკლიის ღრმაწყლოვანი პორტი და ქალაქი ანაკლია უნდა აშენდეს:

"ანაკლიის პორტსა და ქალაქს ჩვენ აუცილებლად ავაშენებთ ქართული ოცნების ხელისუფლებიდან გასტუმრების შემდეგ".

ლელოს დამფუძნებელმა შემდეგი ინიციატივის სახით გააჟღერა ისიც, რომ აფხაზეთიდან დევნილების დაბრუნების გზაზე ისინი ანაკლიაში მიიღებენ სამუშაო ადგილსა და საცხოვრებელს. მანვე დაამატა, რომ მსგავსი თავისუფალი ეკონომიკური ზონა უნდა შეიქმნას შიდა ქართლში საოკუპაციო ხაზთან.

ხაზარაძემ ისაუბრა საქართველოში მცხოვრებ ეთნიკურ უმცირესობებზე და თქვა, რომ უნდა გაძლიერდეს მათი ინტეგრაცია და აქტიური ჩართვა სახელმწიფოს მშენებლობის პროცესში.

ლელოს დამფუძნებელმა საკუთარ გამოსვლაში ვრცლად ისაუბრა ოკუპაციაზეც და თქვა, რომ საქართველოს უნდა ჰყავდეს ძლიერი, კარგად აღჭურვილი პროფესიული ჯარი, "ისეთი, როგორც შვეიცარიას ან ისრაელს".

მანვე ისაუბრა ბიუროკრატიული ხარჯების შემცირებაზეც:

"გამოთავისუფლებული თანხებით და სხვა რესურსებით მივაღწევთ იმას, რომ საქართველოში აღარ იარსებებს არცერთი მოშიმშილე ბავშვი და მოხუცი".

ხაზარაძის განცხადებით, ქვეყანაში უნდა არსებობდეს ღირსეული სახელფასო მინიმუმი, რომელიც ბიზნესსა და სახელმწიფოს შორის რაციონალური დიალოგის შედეგად დადგინდება.

"დეცენტრალიზაცია", — იყო შემდეგი საკითხი, რაზეც ლელოს დამფუძნებელმა ისაუბრა და თქვა, რომ უნდა არსებობდეს თბილისის, ბათუმის, თელავის, ქუთაისის, ზუგდიდის და სხვა ქალაქების ურბანული განვითარების სწორი პოლიტიკა.

მამუკა ხაზარაძის ინიციატივით, განათლების სფეროში უნდა შეიქმნას საგანგებო სახელმწიფო ფონდი, სახელად "ეროვნული კაპიტალი", "რომელიც გამოავლენს ნიჭიერ ახალგაზრდებს, წაახალისებს უნარიან პედაგოგებს".

გაიგეთ მეტი: