ბოდბელმა ეპისკოპოსმა იაკობმა ორთვიანი პაუზის შემდეგ ქადაგებისას კვლავ ხელისუფლება გააკრიტიკა. დღეს, 22 დეკემბერს ბოდბეში ამბიონზე გამოსვლისას მან მრევლს უთხრა, რომ ქართველი ხალხი ვიღაცების სკამების შენარჩუნებით არაა დაკავებული:

"მოიქცენენ ისე, რომ იმსახურებდნენ იმ სკამებს. ჩვენ მოგვყავს და ჩვენ ვუშვებთ ყველას. თუ ხელისუფლება ვერ იქცევა ისე, როგორც უნდა იქცეოდეს, ოპოზიციას არ ეგონოს, რომ ისინი იქცევიან ისე, როგორც საჭიროა. ერთის ცუდი, მეორის სხვა საქციელებს არ ამართლებს. რაც ქართველ ერს უნდა, ის უნდა გააკეთოს ყველამ".

მეუფე იაკობმა ქორეპისკოპოსის წოდება ორი თვის წინ დატოვა და სინოდის ბოლო სხდომაზე მისი საუბრის ფორმის გამო პატიება ითხოვა. ის ეპარქიის მმართველად დატოვეს.

რა თქვა ეპისკოპოსმა იაკობმა

მეუფე იაკობმა 26 ოქტომბერს TV პირველის ეთერში ყოფილ პრემიერ გიორგი კვირიკაშვილის კაბინეტში გამართული შეხვედრა გაიხსენა, სადაც "ეჩალიჩებოდნენ პატრიარქ ილია მეორის გადაყენებაზე და შიო მუჯირის პატრიარქად არჩევაზე". მისი თქმით, შეხვედრას ესწრებოდა სამი ადამიანი: სახელმწიფო უსაფრთხოების სამსახურის მაშინდელი უფროსი ვახტანგ გომელაური, მაშინდელი შინაგან საქმეთა მინისტრი, გიორგი გახარია და გიორგი კვირიკაშვილი.

კითხვაზე, პრემიერთან შეხვედრაზე განიხილებოდა პატრიარქის ტახტიდან ჩამოცილება, თუ მკვლელობა, იაკობმა უპასუხა:

"ყველაზე კარგი ვარიანტი იყო, რომ მოეკლათ... მე მაგას არ დავუშვებ. არც დიმიტრი [შიოლაშვილი], არც პეტრე [ცაავა], არც სხვები, არც ბატონი ბიძინა [ივანიშვილი]... მე შემიძლია გამოვიდე და ყველა მაგათზე ვთქვა, რას აკეთებდნენ, რას აშავებდნენ. ჭკვიანად თუ არ იქნებიან, გადავუვლი თავზე, რომ ჰგონია რომ ქვეყნის ხელმძღვანელია..."

ეპისკოპოს იაკობის თქმით, პრემიერ კვირიკაშვილის ცენტრალურ კაბინეტში გაიმართა ეს შეხვედრა და ამის შესახებ პატრიარქმა ილია მეორემაც იცის. იაკობის მტკიცებით, მას აქვს დოკუმენტები იმაზე, რომ "მეუფე პეტრე და დეკანოზი [გიორგი მამალაძე] ერთად იყვნენ ყველაფერში". სასულიერო პირი ამბობს, რომ "ციანიდის საკითხი" მანამდე, ამ შეხვედრამდე იყო დაგეგმილი, რაშიც "სახელმწიფოც იყო ჩარეული".

მეუფე იაკობის ბრალდებები უარყო პრემიერ-მინისტრმა გიორგი გახარიამ. პროკურატურამ კი დანაშაულის ნიშნები გამორიცხა.