ნაციონალური მოძრაობის ლიდერი, გრიგოლ ვაშაძე აცხადებს, რომ ქართული ოცნების ახალი საარჩევნო ინიციატივა მათთვის აბსოლუტურად მიუღებელია. ამის შესახებ მან დღეს, 20 დეკემბერს მმართველ გუნდთან მორიგი შეხვედრის შემდეგ განაცხადა.

"არ მესმის ამ წინადადების მოტანის აზრი, თუ არა რაღაცნაირად ჩვენი მედიატორების თვალში გამოჩენა, რომ მზად ვართ კომპრომისზე. არ მინდა ისეთი სიტყვები ვიხმარო... ამისთანა არასერიოზულობა მე არ მინახავს", — განაცხადა ვაშაძემ.

ოპოზიციასთან შეხვედრის შემდეგ პარლამენტის თავმჯდომარე არჩილ თალაკვაძემ განაცხადა, რომ ოპონენტებს ახალი სამოქმედო გეგმა შესთავაზეს. საუბარია იმაზე, რომ პარლამენტში პროპორციული წესით 100 დეპუტატი აირჩიონ, ნაცვლად 77-სა. ხოლო მაჟორიტარული მანდატები 50-მდე შემცირდება.

"პოლიტიკურ სპექტრს ჩვენ ვთავაზობთ ინიციატივას, შევინარჩუნოთ მოქმედი შერეული საარჩევნო სისტემა, თუმცა 2/3-მდე გავზარდოთ პროპორციული წილი ამ სისტემაში", — განაცხადა მან.

შეხვედრის დაწყებამდე თალაკვაძემ აღნიშნა, რომ მათი წინადადება დაბალანსებულია.