ქართული ოცნების დეპუტატები ვაშინგტონში საქართველოსთან მეგობრობის ჯგუფის თანათავმჯდომარეს, კონგრესმენ ადამ კინზინგერს შეხვდნენ. ეს პირველი შეხვედრაა მას შემდეგ რაც კინზინგერმა და კონგრესმენმა ჯერალდ ე კონოლიმ პრემიერ-მინისტრ გიორგი გახარიას კრიტიკული წერილი გაუგზავნეს.

მათ პრემიერი პროპორციულ სისტემაზე გადასვლის დაპირების შეუსრულებლობის გამო გააკრიტიკეს. მათივე წერილში აღნიშნულია, რომ გასაპროტესტებლად ქუჩაში გამოსულ ხალხს "მოძალადე ბოროტმოქმედები დაუპირისპირეს".

როგორც საქართველოს პარლამენტის განცხადებაშია აღნიშნული, შეხვედრაზე ორმხრივი ურთიერთობების პრიორიტეტული საკითხების, საქართველოში მიმდინარე რეფორმებისა და ქვეყნის წინაშე არსებული გამოწვევების შესახებ იმსჯელეს.

კონგრესმენთან შეხვედრის შემდეგ პარლამენტის საგარეო ურთიერთობათა კომიტეტის თავმჯდომარემ, ირაკლი ბერაიამ განაცხადა, რომ კონგრესმენების წერილში საქართველოს მხარდაჭერისა და გულშემატკივრობის სულისკვეთება იგრძნობოდა.

"აქვე აუცილებელია ითქვას, რომ საქართველოში მიმდინარე პროცესები გარკვეულწილად განაპირობებს ვაშინგტონში ურთიერთგამომრიცხავი ინფორმაციის მიწოდებას. რადიკალური ოპოზიციის მიერ, საზღვარგარეთ ქვეყნის იმიჯის დაზიანების, დესტრუქციული ნაბიჯებისა და მიზანმიმართული მცდელობის საპასუხოდ, ჩვენ გავაგრძელებთ ჩვენს პარტნიორებთან ინტენსიურ რეჟიმში კომუნიკაციას და საქართველოში მიმდინარე პროცესებზე მათთვის ობიექტური ინფორმაციის მიწოდებას", — აღნიშნავს ბერაია.

ვაშინგტონში პარლამენტის დელეგაციას ვიცე-სპიკერი კახა კუჭავა ხელმძღვანელობს და მის შემადგენლობაში ქართული ოცნების აღმასრულებელი მდივანი ირაკლი კობახიძე და პარლამენტის საგარეო ურთიერთობათა კომიტეტის თავმჯდომარე ირაკლი ბერაია არიან.

16 დეკემბერს დეპუტატები IRI-ის პრეზიდენტ დენიელ ტვინინგს და IFES -ს პრეზიდენტ მაიკლ სვეტლიკს შეხვდნენ.