ბათუმში დაჭრილი პოლიციელის მდგომარეობა სტაბილურია. რესპუბლიკური საავადმყოფოს დირექტორი, მალხაზ ხალვაში On.ge-სთან საუბარში აღნიშნავს რომ პაციენტი ოპერაციის შემდეგ მართით სუნთქვაზე რჩება:

"მდგომარეობა სტაბილურია, პოსტ-ოპერაციულია, შეესაბამება ოპერაციის სიმძიმეს, დინამიკა არის დადებითი და იმედიანი".

საავადმყოფოს დირექტორის ცნობითვე, პოლიციელს კისრის არეში ჰქონდა ღრმა ჭრილობა, დაზიანებულია მცირე ვენა და ხორხის ზედაპირი.

გუშინ, 18 დეკემბერს ბათუმში, ჭავჭავაშის გამზირზე, პოლიციელი დაჭრეს. ადგილზე მისულ სასწრაფო დახმარების ბრიგადას დაჭრილი პოლიციელი არ დახვედრია. აჭარის პოლიციციის დეპარტამენტის დირექტორის, კოტე ანანიაშვილის თქმით, საპატრულო ეკიპაჟი მოქალაქემ შეაჩერა. მისი ინფორმაციით, როცა პოლიციელი მანქანიდან გადმოვიდა, მოქალაქემ ცივი იარაღით ჭრილობა მიაყენა. ეკიპაჟის მეორე წევრმა პირი მაშინვე დააკავა.

საქმეზე გამოძიება სისხლის სამართლის კოდექსის 353¹ მუხლით დაიწყო, რაც პოლიციელზე თავდასხმას გულისხმობს.