ერთიანი ნაციონალური მოძრაობის თავმჯდომარემ, თინა ბოკუჩავამ "ტვ პირველის" ეთერში განაცხადა, რომ მომავალ პარტიულ ყრილობაზე თავმჯდომარის კანდიდატად თავს არ წარადგენს და ვერც "რეფორმების საბჭოში" ხედავს საკუთარ თავს.

მას შემდეგ, რაც საქართველოს მე-3 პრეზიდენტმა, მიხეილ სააკაშვილმა ციხიდან განაცხადა, რომ ენმ-ში რეფორმატორთა საბჭო შეიქმნება, ბოკუჩავა საბჭოში ვერ მოიაზრებს თავს და აცხადებს, რომ "თუ თავმჯდომარის პოზიცია უქმდება, ვერავინ დააყენებს კანდიდატურას".

"თუ რაღაცა ფორმაციის ცვლილება სურს პრეზიდენტ სააკაშვილს, რომელიც ამ პარტიის ლიდერია, მე რიგით წევრად გავაგრძელებ ჩემი ქვეყნის უკეთესი მომავლისთვის ბრძოლას, იმისთვის, რომ ეს ქვეყანა შევიყვანოთ ევროკავშირში, იმისთვის, რომ ჩვენს შვილებს ჰქონდეთ ნათელი მომავალი, იმისთვის, რომ არ გვდევნიდნენ ჩვენი თავისუფალი სიტყვისთვის და აზრისთვის. კიდევ ერთხელ ვიმეორებ, ამისთვის არანაირი თანამდებობა და პოზიცია არასდროს მჭირდებოდა და არც მომავალში დამჭირდება," — განაცხადა ბოკუჩავამ.

ბოკუჩავა დასძენს, რომ ის კვლავ გააგრძელებს თავისი მოვალეობის შესრულებას, ვიდრე ახალი პარტიული ყრილობა ახალ ხელმძღვანელს არ აირჩევს.

"ჩემი ორწლიანი მანდატი, რომელიც პარტიულმა ყრილობამ მომანიჭა, ამოიწურა 2026 წლის 8 ივლისს. წესდებით გათვალისწინებულია, რომ მე გავაგრძელებ ამ მნიშვნელოვანი პასუხისმგებლობის მოვალეობის შესრულებას მანამ, სანამ ახალი პარტიული ყრილობა არ აირჩევს ახალ ხელმძღვანელ პირს და მიუხედავად იმისა, რომ ახლა საუბარია იმაზე, რომ თავმჯდომარის პოსტის გაუქმება მოხდეს, ფორმალურად, სამართლებრივად, ეს ასე ვერ მოხდება," — განაცხადა ბოკუჩავამ.

მოგვიანებით ნანუკა ჟორჟოლიანი თინა ბოკუჩავას კომენტარს გამოეხმაურა. მან უარყო ინფორმაცია პარტიის თავმჯდომარის პოსტის გაუქმების შესახებ და თქვა, რომ პარტიის წევრები ცვლილებების შესახებ მუდმივად ინფორმირებულები არიან.

"თავმჯდომარეობა არ უქმდება ნაციონალურ მოძრაობაში. სიმართლე გითხრათ, ცოტათი გაკვირვებულიც კი ვარ [თინა ბოკუჩავას კომენტარით], ყველამ ვიცით ამის შესახებ პარტიაში.

მე მაქვს ყოველდღე შეხვედრები პარტიის წევრებთან, როგორც გუნდის ძველ წევრებთან, ისე რეგიონის წარმომადგენლებთან და ,შესაბამისად, ეს ყველამ იცის პარტიაში, რომ ამ პოზიციის განხილვა დღის წესრიგში საერთოდ არ დგას," — განაცხადა ჟორჟოლიანმა.

ჟორჟოლიანის განმარტებით, საბჭოს ექვსთვიან დროებითი მმართველობითი ჯგუფი პარტიულ ორგანო არ იქნება და შეიქმნა იმიტომ, რომ "ერთმა არ მიიღოს გადაწყვეტილება ამ ექვსი თვის ვადაში და მასში მონაწილეობა შეძლონ როგორც ვეტერანებმა ისე ახალგაზრდებმა".ადმ

"აქ არის საუბარი ექვსთვიან დროებით მმართველობით ჯგუფზე. რეფორმატორთა საბჭოს თავმჯდომარე და ხელმძღვანელი არის მიხეილ სააკაშვილი. ეს რეფორმატორთა საბჭო არ არის პარტიული ორგანო, ეს არ არის პარტიული სტრუქტურა, ანუ არჩევნები სად უნდა ჩაგვეტარებინა? არჩევნებში მონაწილეობა ვის უნდა მიეღო? ანუ მიხეილ სააკაშვილი ამ პოზიციაზე ვის უნდა აერჩია? ეს არ არის პარტიული სტრუქტურა. რადგან ვადა გაუვიდა როგორც თავმჯდომარის, ისე აღმასრულებელი ხელისუფლების მნიშვნელოვან წარმომადგენლებს, შეიქმნა დროებითი საბჭო იმიტომ, რომ ერთმა არ მიიღოს გადაწყვეტილება ამ ექვსი თვის ვადაში და მასში მონაწილეობა შეძლონ როგორც ვეტერანებმა, ისე ახალგაზრდებმა," — განაცხადა ჟორჟოლიანმა.

შეგახსენებთ, 8 ივლისს მიხეილ სააკაშვილმა ციხიდან დაწერა, რომ ერთიანი ნაციონალური მოძრაობის "რეფორმატორთა საბჭოს" შექმნას გეგმავს, რაც "შიდაპარტიულ რეფორმებს" გულისხმობს. სააკაშვილის განცხადებით, ის თავად იქნება თავმჯდომარე, ხოლო ჟურნალისტი ნანუკა ჟორჟოლიანი — აღმასრულებელი მდივანი.

სააკაშვილის თქმით, 8 ივლისს, ნაციონალური მოძრაობის ყველა თანამდებობის პირს უმთავრდება წესდებით დადგენილი უფლებამოსილება და თანამდებობას "ფორმალურად" სოლიდარობის მიზნით პატიმრობაში მყოფი ლევან ხაბეიშვილი შეინარჩუნებს.