"ალეკო, შენ გვერდით ვარ!" — პარტია კოალიცია ცვლილებისთვის ერთ-ერთი ლიდერი, ნიკა გვარამია პარტია მოქალაქეების ლიდერის, ალეკო ელისაშვილისთვის 13 წლიანი პატიმრობის განაჩენს სოციალურ ქსელში ეხმაურება და აცხადებს, რომ ელისაშვილი "რეჟიმის მსხვერპლია" და მხარდაჭერას იმსახურებს.

"13 წელი მიუსაჯეს ალეკო ელისაშვილს. ჩემი აზრით, ძალიან მივქარავთ, როცა ამ კაცს ყურადღების მიღმა ვტოვებთ. იმიტომ, რომ ქოცების მიერ მისი ტერორისტად შერაცხვა გვაკომპლექსებს. წისქვილის ქვა დაატრიალეს ალეკოს თავს და ამ ვითარებაში რომ წონასწორობა დაეკარგა, ნამდვილად არაა გასაკვირი. რეჟიმის მსხვერპლია ეს კაცი და იმსახურებს მხარდაჭერას ისიც და მისი ოჯახიც!

ალეკო, შენ გვერდით ვარ! არ იფიქრო, რომ არ მახსოვხარ და არ გგულშემატკივრობ! მალე თავისუფლებაზე!", — წერია განცხადებაში.

ცნობისთვის, ალეკო ელისაშვილს, 13 წლით თავისუფლების აღკვეთა მიესაჯა. გადაწყვეტილება მოსამართლე გიორგი გელაშვილმა მიიღო.

ოფიციალური ბრალდების მიხედვით, ელისაშვილს გამოძიება სისხლის სამართლის კოდექსის 19-323-ე მუხლის პირველი ნაწილით ედავებოდა. აღნიშნული მუხლი ტერორისტული აქტის მომზადებას ან მცდელობას შეეხება და ითვალისწინებს ისეთი ქმედების ჩადენას, როგორიცაა აფეთქება, ცეცხლის წაკიდება, იარაღის გამოყენება ან სხვა მსგავსი მოქმედება ტერორისტული მიზნით, რომელიც საფრთხეს უქმნის ადამიანის სიცოცხლეს ან იწვევს მნიშვნელოვან ქონებრივ ზიანს. მუხლი 10-დან 15 წლამდე თავისუფლების აღკვეთას ითვალისწინებს.