მზია ამაღლობელის საქმის მთავარი ფიგურანტი — ირაკლი დგებუაძე თბილისის პოლიციის დეპარტამენტის დეტექტივების მთავარი სამმართველოს უფროსად დაინიშნა. მანამდე, მიმდინარე წლის იანვარში, ის შსს-ს ცენტრალური კრიმინალური პოლიციის დეპარტამენტის ორგანიზებულ დანაშაულთან ბრძოლის მთავარი სამმართველოს უფროსი გახდა.

ირაკლი დგებუაძე 2022 წლიდან ბათუმის პოლიციის დეპარტამენტის დირექტორი იყო. ეს თანამდებობა 2025 წლის სექტემბერში დატოვა. ამის შედეგ ის ცენტრალური კრიმინალური პოლიციის კრიმპოლის საერთაშორისო თანამშრომლობის ცენტრის უფროსი გახდა, თუმცა ამ თანამდებობაზე ცოტა ხნით იმუშავა და მალევე ორგანიზებულ დანაშაულთან ბრძოლის მთავარი სამმართველოს უფროსი გახდა.

ირაკლი დგებუაძე "ნეტგაზეთისა" და "ბათუმელების" გამომცემლისა და დირექტორის, მზია ამაღლობელის საქმეში "დაზარალებულად" ცნეს. მოსამართლე ნინო სახელაშვილმა მზია ამაღლობელს ირაკლი დგებუაძისთვის სილის გაწვნისთვის 2-წლიანი პატიმრობა მიუსაჯა.

სასამართლომ ამაღლობელს ბრალდება 353-ე მუხლის პირველი ნაწილით გადაუკვალიფიცირა, რაც პოლიციის მუშაკისთვის წინააღმდეგობის გაწევას, საზოგადოებრივი წესრიგის დაცვისთვის ხელის შეშლას გულისხმობს. მანამდე პროკურატურა ამაღლობელს პოლიციელზე თავდასხმას ედავებოდა, რაც 4-დან 7 წლამდე პატიმრობას ითვალისწინებდა.