იუსტიციის მინისტრის, თეა წულუკიანის თქმით, უზენაესის მოსამართლეების დანიშვნასთან დაკავშირებით ევროპელმა პარტნიორებმა საქართველოს პარლამენტის გადაწყვეტილებას პატივი უნდა სცენ.

"სხვ მხრივ ეს სახელმწიფო ვერ შედგება, ჩვენ თუ ყველას ტაშს დავუკრავთ, მოდი და გაგვაკრიტიკე", — ამის შესახებ მინისტრმა გადაცემა თავისუფალ თემაში განაცხადა.

ამავე დროს, ის ამბობს, რომ ევროპელი პარტნიორების მოსაზრება მნიშვნელოვანი და საყურადღებოა:

"გუშინდელ და დღევანდელ განცხადებებს არ ვგულისხმობ, უფრო წინა დღეებში გაკეთებული განცხადებები, რომლებიც სავსე იყო მხოლოდ ნეგატივით, რა თქმა უნდა, ძალიან არასასიამოვნო იყო, რადგან, რეალურად, ამ ყველაფერს არაობიექტურობის ელფერი ჰქონდა".

მისივე თქმით, შვიდი წლის მანძილზე ქართულმა ოცნებამ სასამართლო სისტემის ოთხი ფუნდამენტური რეფორმა გაატარა მაშინც, როცა ევროპაში კანონის მიღებას ან მუხლის შეცვლას ორი წელი სჭირდება. მისივე თქმით, პარტნიორებისთვის ობიექტური ინფორმაციის მიწოდებისთვის უკეთესი მუშაობაა საჭირო.

"ჩვენს ქვეყანაში არის ბევრი გამოწვევა, ბევრი სისტემატური გარდაქმნა კიდევ არის აუცილებელია. ის, რომ ჩვენმა მეგობრებმა პატივი უნდა სცენ ჩვენი ქვეყნის დამოუკიდებელ ინსტიტუტებს, იმიტომ რომ, ჩვენ ვართ დამოუკიდებელი ქვეყანა, ეს არის ერთ-ერთი ფუნდამენტი, რაც ყველას უნდა გვახსოვდეს. მე რჩევაც მივეცი ევროპელებს, რომ თქვენც ჩაატარეთ-მეთქი ლაივში უზენაესი სასამართლოს მოსამართლეების არჩევა, რასაც, რა თქმა უნდა, არ გააკეთებენ, რადგან ეს გაუგონარი რამ არის რაც ჩვენ გავაკეთეთ", — განაცხადა წულუკიანმა.

მიუხედავად სამოქალაქო საზოგადოების, საერთაშორისო ორგანიზაციებისა და ოპოზიციის პროტესტისა ქართულმა ოცნებამ უზენაეს სასამართლოში უვადოდ 14 კანდიდატი დანიშნა. ისინი 20 კაციანი სიიდან იყვნენ შერჩეული. მომხდარს გამოეხმაურა აშშ-ის საელჩოც და განაცხადა, რომ სიაში მოხვდა კანდიდატთა ის ნაწილი, ვინც "მოსმენებისას ვერ შეძლო საკმარისად წარმოეჩინა იურიდიული ცოდნა ან ერთგულება მიუკერძოებლობისადმი".

უზენაესის უვადო მოსამართლეებს შორის არიან ყოფილი გენერალური პროკურორი შალვა თადუმაძე და მისი ყოფილი პირველი მოადგილე მამუკა ვასაძე. გარდა ამისა, უვადო მოსამართლეები გახდნენ მერაბ გაბინაშვილი, მირანდა ერემაძე, მაია ვაჩაძე, თამარ ზამბახიძე, ვლადიმერ კაკაბაძე, ლევან მიქაბერიძე, გიორგი მიქაუტაძე, ნუგზარ სხირტლაძე, ლალი ფაფიაშვილი, ნინო ქადაგიძე, ქეთევან ცინცაძე და ალექსანდრე წულაძე.