თავდაცვის სამინისტროს ინფორმაციით, გუშინ მძიმედ დაშავებული სამხედრო მოსამსახურეების მდგომარეობა დასტაბილურდა და არცერთი მათგანის სიცოცხლეს საფრთხე არ ემუქრება.

თავდაცვის მინისტრის მოადგილის, გიორგი ბუთხუზის თქმით, სამხედრო მოსამსახურეების ჯანმრთელობის მდგომარეობა აბსოლუტურად კონტროლირებადია და ექვემდებარება მკურნალობას. მისი განმარტებით, რადენიმე სამხედრო მოსამსახურე მალე დატოვებს ჰოსპიტალს და დაუბრუნდება სამხედრო ნაწილს. ინგოროყვას კლინიკაში რჩება 4 სამხედრო მოსამსახურე, რომლებიც შედარებით მძიმე მდგომარეობაში დედოფლისწყაროდან გადმოიყვანეს.

უწყების თქმით, ევექსის ტრავმატოლოგიურ ჰოსპიტალში მოთავსებულ 4 სამხედრო მოსამსახურიდან ერთს კლინიკიდან დღეს გაწერენ, 3 კი ინტენსიური თერაპიის განყოფილებაში რჩება.

სამხედრო ავტომობილი, რომელშიც 36 სამხედრო მოსამსახურე და ერთი სამოქალაქო პირი იმყოფებოდა, ავარიაში ბოდბესთან ახლოს მოყვა. ჯარების ლოგისტიკური უზრუნველყოფის სარდლობის საბრძოლო მასალებისა და სამხედრო - ტექნიკური ქონების შენახვის ბაზის სამხედრო მოსამსახურეები დედოფლისწყაროდან ოსიაურისკენ გადაადგილდებოდნენ.

ავტოსაგზაო შემთხვევის შედეგად გარდაიცვალა ერთი სამხედრო მოსამსახურე. 27 დაშავებული სამხედრო მოსამსახურე ჯერ დედოფლისწყაროს საავადმყოფოში გადაიყვანეს, მოგვიანებით სამხედროების ნაწილი გორის ჰოსპიტალში, ნაწილი კი თბილისის კლინიკებში განათავსეს.