"იქ სადაც ირღვევა თქვენი უფლებები, აზრი არ აქვს ჩემი უფლებების დაცვას" — ამ სიტყვებით გამოეხმაურა ქართული ოცნების დეპუტატი, რატი იონათამიშვილი დღეს, იურიდიულ საკითხთა კომიტეტის სხდომიდან ჟურნალისტების ძალის გამოყენებით გაყვანას.

"ჩვენ უნდა გავითვალისწინოთ ამ შემთხვევაში, რომ შეიძლება ბოლომდე რეგლამენტის ჩარჩოებში ვერ დავრჩეთ, იმიტომ რომ არის დინამიური პროცესი, მაქსიმალური საჯაროობა და ჩვენ ეს უნდა ვუზრუნველვყოთ. მე მაინც ვფიქრობ, რომ თუ არჩევანია, ბოლომდე მივყვეთ რეგლამენტის ჩარჩოებს, ბოლომდე ვუზრუნველვყოთ ის, რომ ჟურნალისტებმა ყველაზე კარგი ხედით გააშუქონ მოვლენები, ჩვენ მოვლენების ყველაზე კარგი ხედით გაშუქების სასიკეთოდ უნდა მივიღოთ გადაწყვეტილება", — თქვა რატი იონათამიშვილმა ფორმულასთან საუბრისას.

ტელეკომპანია ფორმულასთან საუბრისას რატი იონათამიშვილმა ასევე აღნიშნა, რომ საზოგადოება მედიის საშუალებით იგებს იმას, რასაც დეპუტატები აკეთებენ და ასეთ მნიშვნელოვან დღეს მათი საქმიანობის შეზღუდვა დაუშვებელია.

დღეს, 12 დეკემებერს იურიდიულ საკითხთა კომიტეტმა უვადოდ დასამტკიცებელი 14 მოსამართლის სიას რეკომენდაცია გაუწია. ამ სიაში არიან: მერაბ გაბინაშვილს, მირანდა ერემაძეს, მამუკა ვასაძეს, მაია ვაჩაძე, თამარ ზამბახიძე, შალვა თადუმაძე, ვლადიმერ კაკაბაძეს, ლევან მიქაბერიძე, გიორგი მიქაუტაძეს, ნუგზარ სხირტლაძეს, ლალი ფაფიაშვილს, ნინო ქადაგიძეს, ქეთევან ცინცაძეს და ალექსანდრე წულაძეს.

სხდომის დარბაზიდან მანდატურის სამსახურმა ჟურნალისტები ძალის გამოყენებით გაიყვანა და მათ მოვალეობის შესრულების შესაძლებლობა არ ეძლეოდათ.

სიისთვის კენჭისყრას ეწინააღმდეგებოდნენ საპარლამენტო ოპოზიცია და დამოუკიდებელი დეპუტატები. მათი თქმით პროცესი არალეგიტიმურია. ეკა ბესელია ანრი ოხანაშვილს უზენაესის მოსამართლეების საკითხის განხილვის უფლებას არ აძლევდა. ბესელია ამბობს, რომ არასასესიო კვირაში მოსამართლეთა კანდიდატების საკითხის განხილვა, პარლამენტის რეგლამენტის დარღვევაა.