საქართველოს პარლამენტის მანდატურებმა იურიდიულ საკითხთა კომიტეტის დარბაზი მედიის წარმომადგენლებს ძალის გამოყენებით დაატოვებინეს. ეს მას შემდეგ მოხდა, რაც დეპუტატმა ეკა ბესელიამ ანრი ოხანაშვილს სხდომის წაყვანის საშუალება არ მისცა, სადაც უზენაესის მოსამართლეობის კანდიდატებისთვის კენჭი უნდა ეყარათ.

ოხანაშვილმა სხდომაზე ტექნიკური შესვენება გამოაცხადა და ჟურნალისტების გაყვანას მოითხოვდა. ამის შემდეგ მანდატურებმა მედიის წარმომადგენლები ძალის გამოყენებით გაიყვანეს.

მას შემდეგ რაც ჟურნალისტებმა მანდატურების მხრიდან ძალადობაზე მიუთითეს, მათთან დეპუტატი სოფო კილაძე მივიდა და მედიის წარმომადგენლები ისევ დარბაზში დააბრუნა.

განახლება: 12 დეკემბრის მოვლენები მოკლედ

დღეს, 12 დეკემბერს სამოქალაქო მოძრაობის აქტივისტებმა და პოლიტიკური პარტიის წარმომადგენლებმა პარლამენტის შესასვლელების პიკეტირება სცადეს, თუმცა დეპუტატები საკანონმდებლო ორგანოში მაინც შევიდნენ. აქციაზე პოლიციამ ჯამში 16 პირი დააკავა.

პარლამენტის უპარტიო დეპუტატი, ეკა ბესელია ამბობდა, რომ მოსამართლეთა არასასესიო კვირაში არჩევა პარლამენტის რეგლამენტს ეწინააღმდეგებოდა. ის რამდენიმე წუთის განმავლობაში კომიტეტის თავმჯდომარეს არ აძლევდა საშუალებას კანდიდატურები განეხილათ.

პროცესის ჩასაშლელად კენჭისყრის დაწყებამდე რამდენიმე წუთით ადრე პლენარულ სხდომათა დარბაზში გაურკვეველი ნივთიერება გაუშვეს, რამდენიმე ადამიანი ცუდად გახდა. ამ მიზეზით სხდომათა დარბაზი დაატოვებინეს დეპუტატებს და კენჭისყრამ რამდენიმე საათით გადაიწია. საქმეზე გამოძიება შსს-მ სისხლის სამართლის კოდექსის 117-ე მუხლით დაიწყო. ამ მუხლით ჯანმრთელობის განზრახ მძიმე დაზიანება მინიმუმ 3-წლიანი პატიმრობით ისჯება. ქართულმა ოცნების ერთ-ერთმა დეპუტატმა მომხდარი ტერორისტულ აქტად, დანარჩენებმა კი ქიმიურ თავდასხმად შეაფასეს. მომხდარზე პასუხისმგებლობა #სირცხვილიამ აიღო.

საბოლოოდ, კენჭისყრა მაინც ჩატარდა და ქართულმა ოცნებამ 14 მოსამართლე უზენაეს სასამართლოში უვადოდ დანიშნა.