დმანისში ჩასულ ალეკო ელისაშვილსა და სამოქალაქო მოძრობას ქალაქში ქართულ ოცნების მაჟორიტარი დეპუტატის, კახაბერ ოქრიაშვილის მიერ დამზადებული ბანერი და პლაკატები დახვდა.

"სტუმართმოყვარე დმანისი. კეთილი იყოს ოპოზიციისა და არამარტო ოპოზიციის მობრძანება დმანისში", — წერია ბანერზე.

გარდა ამისა, ქალაქში გავრცელებულია პლაკატები წარწერით "კეთილი იყოს თქვენი მობრძანება, ალეკო".

ფოტო: სამოქალაქო მოძრაობა

როგორც დმანისის მაჟორიტარმა, კახაბერ ოქრიაშვილმა On.ge-ს უთხრა, ბანერები მისი ინიციატივითა და პირადი ხარჯებით დამზადდა. მისივე მტკიცებით, მას არ სურს მოქალაქეებს შორის დაპირისპირება.

"არ მსურს ვიხილო პოლიტიკური ჩხუბები. ინტრიგები და მაიმუნობები. ამიტომ გავაკეთე. ვნახე, რომ ალეკო ელისაშვილი მობრძანდებოდა დმანისში და ასეთი იუმორისტული დახვედრა მოვაწყვეთ იმიტომ, რომ არ მინდა პოლიტიკური დაძაბული იყოს ქვეყანაში. ეს არის მესიჯი", — განაცხადა ოქრიაშვილმა.

ალეკო ელისაშვილის სამოქალაქო მოძრაობამ მაჟორიტარი დეპუტატების ე.წ. მხილების კამპანია დაიწყო. დღეს, 7 დეკემბერს ალეკო ელისაშვილი აპირებს, რომ დმანისის მოსახლეობას კახაბერ ოქრიაშვილის საქმეები გააცნოს და პროპორციული სისტემის უპირატესობაზე ისაუბროს.

კახა ოქრიაშვილი ერთ-ერთი ის დეპუტატია, რომელიც პროპორციულ საარჩევნო სისტემას ეწინააღმდეგება. მისი მოსაზრებით, მოსახლეობი 99 პროცენტი ვერ ერკვევა რა არის კარგი პროპორციულ საარჩევნო სისტემაში.