რუსეთის პრემიერ-მინისტრი, დიმიტრი მედვედევი ამტკიცებს, რომ თავის კარიერაში ყველაზე რთული გადაწყვეტილებები საპენსიო რეფორმასა და 2008 წელს აგვისტოს ომს ეხება. ოკუპანტი ქვეყნის პრემიერი ამბობს, რომ აგვისტოს ომში საქართველოს აგრესიის მოგერიება მოუწია.

"ყველზე რთული გადაწყვეტილებაა ისაა, რომლებიც ქვეყნისთვის ან ხალხისთვის სერიოზულ პრობლემებს ქმნიან. ერთხელ საქართველოს აგრესიაზე საპასუხო დარტყმის შესახებ გადაწყვეტილების მიღება მომიწია. მაშინ სახელმწიფოს ჯერ კიდევ ახალგაზრდა მმართველი ვიყავი. ეს ძალიან რთული იყო, რადგან, ფაქტობრივად, თანამდებობის დაკავებიდან ორ თვეში ასეთი გადაწყვეტილების მიღება მომიწია", — განაცხადა მედვედევმა.

გარდა ამისა, მან აღნიშნა, რომ მის კარიერაში ერთ-ერთი ყველაზე რთული საპენსიო ასაკის გაზრდის გადაწყვეტილება იყო.

2008 წლის 7 აგვისტოს დილით რუსეთის რეგულარულმა სამხედრო ძალებმა გადმოლახეს საქართველოს საზღვარი როკის გვირაბის გზით და შემოიჭრნენ საქართველოს ტერიტორიაზე. საქართველოში შემოჭრილმა რუსულმა ძალებმა წამოიწყეს სამხედრო შეტევა საქართველოს წინააღმდეგ, რომელიც უწყვეტად გაგრძელდა ომის მომდევნო დღეების მანძილზეც.

აგვისტოს ომმა 400-ზე მეტი ადამიანის სიცოცხლე იმსხვერპლა, მათ შორი 170 სამხედრო მოსამსახურე იყო. ჯანდაცვის სამინისტროს მონაცემებით, ომში დაიჭრა/დაშავდა 2 232 პირი, მათგან 1 045 სამხედრო მოსამსახურე. ომის დაწყებიდან ათი წელი გავიდა, თუმცა რუსეთი დღემდე არღვევს სუვერენული სახელმწიფოს საზღვრებს და იტაცებს ხალხს.