ევროპული საქართველოს ლიდერი გიგა ბოკერია აცხადებს, რომ ნინო ბურჯანაძის რუსეთში ვიზიტი გასაკვირი არავისთვის უნდა იყოს, რადგან ეს აქამდეც არერთხელ მომხდარა. რაც შეეხება ოპოზიციურ გაერთანებას, რომლის წევრი ბურჯანაძეცაა, ბოკერია განმარტავს, რომ ისინი იდეოლოგიურად ფუნდამენტალურად განსხვავდებიან ერთმანეთისგან და არც ესაა უცხო.

"ახლა აღმოაჩინეს ივანიშვილის პროპაგანდის ორგანოებმა, რომ ეგრე დადის იქ? პრობლემას ზოგადად როგორ არ ვხედავ, მაგრამ იქ შეკრებილია ხალხი, რომელსაც დიდი განსხვავება აქვს ყველაფერზე, მაგრამ თანხმდება ერთ რამეზე — თამაშის წესებზე. ზოგადად ეგრე ხდება, როცა უცხოპლანეტელები შემოგესევა იქ ყველა ერთიანდება და ეს კაცი, ივანიშვილი, უცხოპლანეტელია", — განუცხადა მან რუსთავი 2-ს.

პარტია დემოკრატიული მოძრაობა — ერთიანი საქართველოს ლიდერი ნინო ბურჯანაძე მოსკოვში გაფრინდა. პოლიტიკოსი შეხვედრას პრეზიდენტის ადმინისტრაციაში გამართავს, თუმცა პრესამსახურის თქმით, უცნობია უშუალოდ ვლადიმერ პუტინს შეხვდება თუ არა.

პრესსამსახურის ინფორმაციით, ნინო ბურჯანაძე მოსკოვში რუსეთ-საქართველოს ურთიერთობებზე სასაუბროდ, ასევე, ვაჟა გაფრინდაშვილის საქმის განსახილველად ჩავიდა. მათი თქმით, ვიზიტი თვენახევრის წინ იყო დაგეგმილი და ამაზე გაერთიანებული ოპოზიცია ინფორმირებულია.

ინფორმირება ოპოზიციის ნაწილმა დაადასტურა, ნაწილმა კი არა. თაკო ჩარკვიანის განცხადებით, ვიზიტის შესახებ რამდენიმე ადამიანმა სრულიად მოულოდნელად გაიგო. ამის გამო მან ოპოზიციის დროებითი გაერთიანება დატოვა.

ეს პირველი შემთხვევა არაა, როცა ნინო ბურჯანაძე მოსკოვში პოლიტიკური ვიზიტით ჩავიდა. ის არაერთხელ შეხვედრია ვლადიმერ პუტინს. დემოკრატიული მოძრაობა — ერთიანი საქართველოს ლიდერი ესწრებოდა რუსეთის ფედერაციის მიერ ორგანიზებულ ევრაზიულ ქალთა ფორუმს, რომელსაც დე ფაქტო აფხაზეთის დელეგაციაც ესწრებოდა. ნინო ბურჯანაძეს ნათქვამი აქვს, რომ რუსეთში ყველა ვიზიტზე პატრიარქს წინასწარ აყენებს საქმის კურსში.

გაიგეთ მეტი: