რუსეთში ნინო ბურჯანაძის ვიზიტის გამო თაკო ჩარკვიანი და მისი პარტია კანონი და სამართალი პროპორციული საარჩევნო სისტემასთან დაკაშვირებულ დროებით ოპოზიციურ გაერთიანებას ტოვებს. ამის შესახებ მან ფეისბუქზე დაწერა.

როგორც ჩარკვიანი წერს, ბურჯანაძის ვიზიტის შესახებ რამდენიმე ადამიანმა სრულიად მოულოდნელად გაიგო და ამის შესახებ წინასწარ უნდა ყოფილიყვნენ ინფორმირებული.

"როცა მთელს მსოფლიოს ვეუბნებით, რომ რუსეთი გვებრძვის და იბრძვის, რომ დაგვაბრუნოს თავის სივრცეში, აი, ამ დროს სრულიად უადგილოდ მეჩვენება ეს ვიზიტი, თორემ მე არანაირი უფლება არ მაქვს, რომ რუსულ ვექტორს "სირბილი" დავუშალო მოსკოვში პუტინთან, მაგრამ ამ უმძიმეს ვითარებაში, ვფიქრობ ტალახი ყველას, მთელ ქვეყანას ესხმება! პროპორციული გასაგებია, მაგრამ სულ მთლად ნუ დავაბნევთ უცხოელ — ევროპელ პარტნიორებს, რომლებსაც თან დახმარებას ვთხოვთ! ბრძოლა უზურპატორის წინააღმდეგ გრძელდება — "პუტინი" კაბაში მეყოლება თუ შარვალში ამ ქვეყანაში, ჩემთვის დიდი მნიშვნელობა არ აქვს!" — წერს ჩარკვიანი.

დღეს, 3 დეკემბერს ცნობილი გახდა, რომ პარტია დემოკრატიული მოძრაობა — ერთიანი საქართველოს ლიდერი ნინო ბურჯანაძე მოსკოვში გაფრინდა. პოლიტიკოსი შეხვედრას პრეზიდენტის ადმინისტრაციაში გამართავს, თუმცა პრესამსახურის თქმით, უცნობია უშუალოდ პრეზიდენტს შეხვდება თუ არა.

პრესსამსახურის ინფორმაციით, ნინო ბურჯანაძე მოსკოვში რუსეთ-საქართველოს ურთიერთობებზე სასაუბროდ, ასევე, ვაჟა გაფრინდაშვილის საქმის განსახილველად ჩავიდა. მათი თქმით, ვიზიტი თვენახევრის წინ იყო დაგეგმილი და ამაზე გაერთიანებული ოპოზიცია ინფორმირებულია.

ნაციონალური მოძრაობის ლიდერის, ნიკა მელიას თქმით, განსხვავებული საგარეო ორიენტაციის პოლიტიკური პარტიები არიან გაერთიანებულნი მხოლოდ ერთი საკითხის თაობაზე, საარჩევნო სისტემასთან დაკავშირებით.

"ჩვენ არ შევრიგებულვართ, ჩვენ მოვრიგდით და ეს მორიგება ეხება მხოლოდ და მხოლოდ პროპორციულ არჩევნებს", — თქვა ნიკა მელიამ On.ge-სთან საუბრისას.

ეს პირველი შემთხვევა არაა, როცა ნინო ბურჯანაძე მოსკოვში პოლიტიკური ვიზიტით ჩავიდა. ის არაერთხელ შეხვედრია ვლადიმერ პუტინს. დემოკრატიული მოძრაობა — ერთიანი საქართველოს ლიდერი ესწრებოდა რუსეთის ფედერაციის მიერ ორგანიზებულ ევრაზიულ ქალთა ფორუმს, რომელსაც დე ფაქტო აფხაზეთის დელეგაციაც ესწრებოდა. ნინო ბურჯანაძეს ნათქვამი აქვს, რომ რუსეთში ყველა ვიზიტზე პატრიარქს წინასწარ აყენებს საქმის კურსში.

გაიგეთ მეტი: