პრემიერი გიორგი გახარია 2 დეკემბრის ღამეს ქართული ოცნების ოფისთან მომხდარ დაპირისპირებაზე ამბობს, რომ ძალადობაში ეჭვმიტანილი ყველა პირი უნდა დაისაჯოს.

"განურჩევლად რომელ მხარეს იყო, უნდა იყოს დასჯილი", — უთხრა გახარიამ ჟურნალისტებს. მან, ასევე, აღნიშნა, რომ არანაირ სამოქალაქო დაპირისპირებაზე სუაბარი არაა და "სახელმწიფო ამას არ დაუშვებს".

"ჩემთვის მნიშვნელოვანია ის, რომ ესაა უაღრესად ემოციური ფონი. ეს გამოიწვია იმან, რომ პოლიტიკური პროცესი პარლამენტის ნაცვლად ქუჩაში მიმდინარეობს. არ დაგვავიწყდეს, რომ ეს ის ახალგაზრდები არიან, რომლებიც დღეს, შეიძლება, ერთმანეთთან ოპონირებენ, მაგრამ ხვალ ამ ხალხმა უნდა ააშენონ ეს ქვეყანა", — თქვა გახარიამ.

პრემიერის განცხადების ფონზე ქართული ოცნების ოფისთან მომხდარი დაპირისპირების შედეგად შინაგან საქმეთა სამინისტროს არავინ დაუკავებია. აქციის დროს დაშავდა 5 აქტივისტი. ისინი მოუწოდებდნენ პოლიციას, რომ დაეკავებინათ აგრესიული პირები, თუმცა უშედეგოდ. აქტივისტები გინების პასუხად, ქართულ სიმღერებს მღეროდნენ.

რა მოხდა ოცნების ოფისთან

2 დეკემბრის ღამეს ქართული ოცნების ახალგაზრდული ფრთის წევრებმა და პარტიის სხვა მხარდამჭერებმა ორბელიანის მოედანზე მიმდინარე კონცერტი დატოვეს და გადმოინაცვლეს ოფისთან, სადაც სიტყვიერ შეურაცხყოფას აყენებდნენ და ფიზიკურად უსწორდებოდნენ მოძრაობა #სირცხვილიას, გაბედეს და შეცვალეს აქტივისტებს. აქტივისიტები ამბობენ, რომ აგრესიული პირები მათ ესროდნენ შუშხუნებს, რომელიც ერთ-ერთ აქტივისტს თვალში მოხვდა.

აქცია "რამდენს ბედავთ?" ოცნების ოფისთან მცხეთაში მომხდარი მოვლენების გასაპროტესტებლად დაიგეგმა, სადაც მოძრაობა გაბედეს აქტივისტებს ფიზიკურად გაუსწორდნენ ოცნების წევრები და მხარდამჭერები. გავრცელებულ კადრებში ჩანს, რომ ერთ-ერთ წაქცეულ აქტივისტს სახეში ურტყამენ ფეხს. ორი დაზარალებული საავადმყოფოში გადაიყვანეს.

ბოლო დღეების მოვლენები

მას შემდეგ, რაც ქართული ოცნების დეპუტატებმა პროპორციული საარჩევნო სისტემის კანონპროექტი ჩააგდეს, საქართველოს მასშტაბით სხვადასხვა ქალაქებში საპროტესტო აქციები იმართება. პროტესტის ფარგლებში პიკეტირებული იყო მთავარი საკანონმდებლო ორგანოც, რომლის შესასვლელებიც ხელისუფლებამ ორჯერ სპეცრაზმისა და წყლის ჭავლის გამოყენებით გახსნა.

აქციის დაშლის შემდეგ ოპოზიციამ და სამოქალაქო აქტივისტებმა პროტესტი ახალი ფორმა "მაინც დაგაბოქლომებთ" დაიწყეს. ისინი სხვადასხვა ადმინისტრაციულ შენობებსა და ქართული ოცნების დეპუტატების ოფისებს ბოქლომებს ადებენ.

მას შემდეგ, რაც პარლამენტის პიკეტი მესამედ დაანონსდა, ხელისუფლებამ პარლამენტის მიმდებარე ქუჩები რკინის კონსტრუქციებით ჩაკეტა. კონსტრუქციები ხელს უშლიდა მოქალაქეებს გადაადგილებაში. პოლიციამ გზები აქციის დაშლის შედეგ გაათავისუფლა.