მოძრაობა გაბედეს აქტივისტებმა მცხეთის მერიასთან, სადაც დიმიტრი ხუნდაძის მაჟორიტარული ბიუროა, პროტესტის ნიშნად 41 ვერცხლის მონეტა მიიტანეს, რასაც დაპირისპირება მოყვა. ისინი დეპუტატთან შეხვედრას ითხოვდნენ, რომ მონეტები გადაეცათ და მოესმინათ განმარტება, თუ რატომ ჩააგდო პროპორციული საარჩევნო სისტემა, თუმცა მათ ადგილზე ქართული ოცნების მხარდამჭერები და პოლიცია დახვდათ.

ქალაქის მერი და მერიის თანამშრომლები გაბედეს აქტივისტებს სიტყვიერად დაუპირისპირდნენ, რაც შემდგომ გარეშე პირების მხრიდან ფიზიკურ დაპირისპირებაში გადაიზარდა.

პოლიციამ ადგილიდან ძალის გამოყენებით გაიყვანა გაბედეს რამდენიმე აქტივისტი, მათ შორის ბექა ნათელაშვილი. ამ ეტაპზე უცნობია ისინი დააკავეს, თუ სიტუაციას განარიდეს.

გაბედეს აქტივისტებმა ახალი საპროტესტო კამპანია დაიწყეს, რომლის ფარგლებშიც ისინი მმართველი პარტიის დეპუტატების ოფისებთან მიდიან და სიმბოლურად 41 ვერცხლს, უფრო ზუსტად კი შოკოლადის მონეტებს უტოვებენ. მათი თქმით, ეს ვერცხლი ეკუთვნის მათ, ვინც "გაიყიდა".

"გამყიდველის ვერცხლი" ბიბლიური ისტორიდანაა, რომლის თანახმადაც მოციქულმა იუდამ იესო ქრისტე 30 ვერცხლად გაყიდა. ამ შეთხვევაში რიცხვი 41 ქართული ოცნების საარჩევნო ნომერს ასახავს.

ეს პირველი შემთხვევა არ არის, როდესაც ქართული ოცნების დეპუტატების ოფისებთან მისვლას დაპირისპირება და დაკავებები მოყვა.

ბოლო დღეების მოვლენები

მას შემდეგ, რაც ქართული ოცნების დეპუტატებმა პროპორციული საარჩევნო სისტემის კანონპროექტი ჩააგდეს, საქართველოს მასშტაბით სხვადასხვა ქალაქებში საპროტესტო აქციები იმართება. პროტესტის ფარგლებში პიკეტირებული იყო მთავარი საკანონმდებლო ორგანოც, რომლის შესასვლელებიც ხელისუფლებამ ორჯერ სპეცრაზმისა და წყლის ჭავლის გამოყენებით გახსნა.

აქციის დაშლის შემდეგ ოპოზიციამ და სამოქალაქო აქტივისტებმა პროტესტი ახალი ფორმა "მაინც დაგაბოქლომებთ" დაიწყეს. ისინი სხვადასხვა ადმინისტრაციულ შენობებსა და ქართული ოცნების დეპუტატების ოფისებს ბოქლომებს ადებენ.

მას შემდეგ, რაც პარლამენტის პიკეტი მესამედ დაანონსდა, ხელისუფლებამ პარლამენტის მიმდებარე ქუჩები რკინის კონსტრუქციებით ჩაკეტა. კონსტრუქციები ხელს უშლიდა მოქალაქეებს გადაადგილებაში. პოლიციამ გზები აქციის დაშლის შედეგ გაათავისუფლა.