2019 წლის კატო მიქელაძის სახელობის ჯილდოს მფლობელი ჟურნალისტი ხატია ღოღობერიძე გახდა. ის გამოცემა ტაბულას ჟურნალისტია.

როგორც ქალთა ფონდი საქართველოში აცხადებს, ღოღობერიძის სტატიები ხშირად ეხმიანება ქალების წინაშე არსებულ მნიშვნელოვან პრობლემებს, სექსუალური შევიწროების, ძალადობისა და გენდერული ნიშნით დისკრიმინაციის ფაქტებს.

ორგანიზაციის გადაწყვეტილებით, წელს კატო მიქელაძის პრემიის თემა მოძრაობებს შორის თანამშრომლობა და თანაკვეთა იყო. ჯილდოზე სულ 16 ქალი იყო წარდგენილი, რომლებიც მომიჯნავე სფეროებში მოღვაწეობენ, თუმცა მათი საქმიანობა მიმართული იყო ქალების უფლებრივი მდგომარეობის გაუმჯობესებისკენ.