იუსტიციის მინისტრმა, თეა წულუკიანმა, რომელიც ეროვნულ ბიბლიოთეკაში პოლიციის კორდონის გავლით, აქციის ფონზე შევიდა, აღნიშნა, რომ დისკომფორტს არ განიცდის.

"არამც თუ რაიმე დისკომფორტი არ არსებობს, არამედ მე და ალბათ ის ადამიანები ვინც ევროკავშირიდან, იუნისეფიდან, ჩვენი ტრადიციული მეგობრები დღეს ამ ღონისძიებას ესწრებოდნენ, ვერ ვინატრებდი ასეთ ფონს და რეკლამას, ის ხალხი, ვინც გარეთ სტვენს არის ის ხალხი, ვინც ნიჩბით ყრიდა ბავშვებს ციხეში. ამიტომ ეს ფონი სიმბოლურია, მადლობა მათ ამ ფონისთვის, იმიტომ, რომ ამით ჩვენ შევძელით საზოგადოებისთვის დაგვენახებინა რეალურად ის, თუ რა იყო მათი სახე, როდესაც ბავშვებს ციხეში ყრიდნენ", — თქვა თეა წულუკიანმა.

მან აღნიშნა, რომ 2015 წლიდან დღემდე გატარებული რეფორმების წყალობით 4 000-ზე მეტი ბავშვი განარიდეს სისხლის სამართლებრივ პასუხისმგებლობას.

თეა წულუკიანი, პარლამენტის ეროვნულ ბიბლიოთეკაში საქართველოში გაეროს ბავშვის უფლებების კონვენციის ოცდამეათე წლისთავთან დაკავშირებულ ღონისძიებას ესწრებოდა.

იუსტიციის მინისტრმა, თეა წულუკიანმა პარლამენტის ეროვნული ბიბლიოთეკის შენობა პოლიციის დახმარებით დატოვა. მინსტრმა კორდონის გავლის გარეშე შენობაში ვერც შესვლა შეძლო.

ოპოზიციის ლიდერები და სამოქალაქო აქტივისტები ეროვნულ ბიბლიოთეკასთან პარლამენტიდან მსვლელობით მივიდნენ. აქტივისტები ამბობენ, რომ ყველგან და ყოველთვის შეუქმნიან დისკომფორტს ქართული ოცნების წევრებს. ბიბლიოთეკასთან მობილიზებულია პოლიცია.

ბოლო დღეების მოვლენები

მას შემდეგ, რაც ქართული ოცნების დეპუტატებმა პროპორციული საარჩევნო სისტემის კანონპროექტი ჩააგდეს, საქართველოს მასშტაბით სხვადასხვა ქალაქებში საპროტესტო აქციები იმართება. პროტესტის ფარგლებში პიკეტირებული იყო მთავარი საკანონმდებლო ორგანოც, რომლის შესასვლელებიც ხელისუფლებამ ორჯერ სპეცრაზმისა და წყლის ჭავლის გამოყენებით გახსნა.

აქციის დაშლის შემდეგ ოპოზიციამ და სამოქალაქო აქტივისტებმა პროტესტი ახალი ფორმა "მაინც დაგაბოქლომებთ" დაიწყეს. ისინი სხვადასხვა ადმინისტრაციულ შენობებსა და ქართული ოცნების დეპუტატების ოფისებს ბოქლომებს ადებენ.

მას შემდეგ, რაც პარლამენტის პიკეტი მესამედ დაანონსდა, ხელისუფლებამ პარლამენტის მიმდებარე ქუჩები რკინის კონსტრუქციებით ჩაკეტა. კონსტრუქციები ხელს უშლიდა მოქალაქეებს გადაადგილებაში. პოლიციამ გზები აქციის დაშლის შედეგ გაათავისუფლა.