ქართული ოცნების მაჟორიტარი დეპუტატის, ნინო წილოსანის თქმით, "ქუჩის ოპოზიცია" პარლამენტის კარებს ამტვრევს, რაზეც ლოგიკური დასკვნა უჩნდება, რომ მათ ხალხის მხარდაჭერა არ აქვთ.

"გამომდინარე იქიდან, რომ არ ჰქონდათ [ხალხის] საკმარისი რაოდენობა, რომ ეფექტური აქცია მოეწყოთ, ისინი მთელი ოჯახის წევრებით იყვნენ წარმოდგენილი და ძალიან კარგი, რომ ასეთი იდეოლოგიური ერთობა აქვთ. ცდილობდნენ, რომ მაქსიმალური ქაოსი შეექმნათ. ის საქციელი, რასაც ისინი ჩადიოდნენ, ჩემთვის პირადად არ ჯდება არანაირ გამოხატვის თავისუფლებაში და არც ცივილურობაში", — თქვა ნინო წილოსანმა რუსთავი 2-თან საუბრისას.

დეპუტატმა აღნიშნა, რომ თუ ოპოზიციას ხალხის ნდობა აქვს, უნდა ელოდებოდნენ საპარლამენტო არჩევნებს და იმარჯვებდნენ.

ნინო წილოსანი ერთ-ერთია ქართული ოცნების იმ დეპუტატებს შორის, რომლებმაც პროპორციულ საარჩევნო სისტემაზე გადასვლას მხარი არ დაუჭირს. 25 ნოემბერს ნინო წილოსანი მმართველმა გუნდმა გარემოს დაცვის კომიტეტის თავმჯდომარედ წარადგინა. მაჟორიტარი დეპუტატი ამბობს, რომ ეს დაწინაურება არაა. მას შემდეგ, რაც ბიძინა ივანიშვილის დაპირება არ შესრულდა ოპოზიციამ და სამოქალაქო აქტივისტებმა პარლამენტთან აქციები დაიწყეს.

დღეს, 28 ნოემბერს პარლამენტთან ოპოზიცია და სამოქალაქო აქტივისტები ცდილობდნენ დეპუტატები შენობაში არ შეეშვათ. პარლამენტთან მობილიზებული იყო პოლიცია და ყველა შესასვლელთან რკინის ჯებირები იყო აღმართული. 26 ნოემბერს, გამთენიისას პარლამენტთან შეკრებილი აქტივისტები, ისევ სპეცრაზმისა და წყლის ჭავლის გამოყენებით დაშალეს. დაშავდა 3 ადამიანი, 28 კი დააკავეს. გასული 12 საათის განმავლობაში პოლიცია აქციის მონაწილეებს ხელს უშლიდა და ართმევდა შეშას და რკინის კასრებს, რომლითაც მათ ღამით გათბობა სურდათ. შინაგან საქმეთა სამინისტროს პრესსამსახურის ვერსიით, ეს იყო კანონის მოთხოვნების შესრულება. ამ შეზღუდვას გამოეხმაურა სახალხო დამცველიც. მან განმარტა, რომ მსგავსი შეზღუდვა კანონიერი არაა.

ბოლო დღეების მოვლენები

მას შემდეგ, რაც ქართული ოცნების დეპუტატებმა პროპორციული საარჩევნო სისტემის კანონპროექტი ჩააგდეს, საქართველოს მასშტაბით სხვადასხვა ქალაქებში საპროტესტო აქციები იმართება. პროტესტის ფარგლებში პიკეტირებული იყო მთავარი საკანონმდებლო ორგანოც, რომლის შესასვლელებიც ხელისუფლებამ სპეცრაზმისა და წყლის ჭავლის გამოყენებით გახსნა.

აქციის დაშლის შემდეგ ოპოზიციამ და სამოქალაქო აქტივისტებმა პროტესტი ახალი ფორმა "მაინც დაგაბოქლომებთ" დაიწყეს. ისინი სხვადასხვა ადმინისტრაციულ შენობებს ბოქლომებს ადებენ. პროტესტის მონაწილეებმა სიმბოლურად უკვე "დააბოქლომეს" პროკურატურა, სახელმწიფო უსაფრთხოების სამსახური, მთავრობის კანცელარია. ასევე, ისინი ბოქლომს ადებენ მაჟორიტარი დეპუტატების ოლქებს.

ოპოზიციამ და მათმა მხარდამჭერებმა აჭარის უმაღლესი საბჭოს ჭიშკარზე ბოქლომი ჩამოკიდეს. გარდა ამისა, ბოქლომები დაადეს პარლამენტის თავმჯდომარის, არჩილ თალაკვაძისა და დეპუტატ მიხეილ ყაველაშვილის ბიუროს ოფისებს. "დაბოქლომებულია" ასევე მთავრობის კანცელარია, პროკურატურა და პრეზიდენტის რეზიდენცია.