პოლიტიკური კრიზისის ფონზე ჩაწერილი მორიგი ინტერვიუ ტრადიციულად შეუქეს ბიძინა ივანიშვილს გუნდის წევრებმა. პრემიერი და ზოგიერთი მინისტრი შეჯერდა იმაზე, რომ პარტიის თავმჯდომარე "ჩვეული გულწრფელობით" სცემდა პასუხებს საზოგადოებაში დაგროვილ კითხვებს.

"ბატონმა ბიძინამ აბსოლუტურად, გულწრფელად, ღიად უპასუხა საზოგადოებაში დაგროვილ კითხვებს", — თქვა პრემიერ-მინისტრმა გიორგი გახარიამ და აღნიშნა ისიც, რომ მისთვის ცხადი გახდა ის მიზანიც, რაც ინტერვიუში გამოჩნდა — "აბსოლუტურად დემოკრატიულ გარემოში ქვეყნის მართვის სირთულე".

ყოფილმა პრემიერმა და თავდაცვის მინისტრმა, ირაკლი ღარიბაშვილმა ინტერვიუს შეფასებისას პრემიერის მსგავსად "გულწრფელობა" ახსენა. ღარიბაშვილის განცხადებით, ქვეყნის გრძელვადიან განვითარებას "ექსტრემისტული ოპოზიცია" აფერხებს.

"ჩემი შეფასება არის შემდეგი, რომ ბატონი ბიძინა ჩვეული გულწრფელობით არის მოწოდებული. მან სრულად, გულწრფელად გასცა პასუხი ყველა იმ კითხვას, რომელიც დღეს საზოგადოებას აწუხებს და ყველა იმ აბსურდულ ბრალდებას და ცილისწამებას, რომელიც მომდინარეობს ყველაზე რადიკალური, დესტრუქციული და ექსტრემისტული ოპოზიციად წოდებული ძალის მხრიდან", — განაცხადა ღარიბაშვილმა.

ივანიშვილის გამოსვლა შეაფასა ეკონომიკის მინისტრმა, ნათია თურნავამაც. მთავრობის სხდომის დასრულების შემდეგ მან აღნიშნა, რომ ინტერვიუ იყო "ძალიან სიღრმისეული და ძალიან გულწრფელი ანალიზი".

"ეს ანალიზი მოიცავდა პასუხს იმ რადიკალური ფრთის განწყობების მიმართაც, ვინც ასე ვთქვათ, თავისი რადიკალიზმით ცდილობს, დესტრუქცია შემოიტანოს დღევანდელ განვითარებაში“, — აღნიშნა ნათია თურნავამ.

თურნავას თქმით, პარტიის თავმჯდომარის ინტერვიუში ადეკვატური პასუხი გაეცა ბევრ კითხვას, რომელიც შესაძლოა არსებობდეს საზოგადოებაში. მანვე აღნიშნა, რომ, როგორც ეკონომიკის მინისტრისთვის, განსაკუთრებით მნიშვნელოვანი იყო დასაქმების ნაწილი.

"ეს ყველაფერი კეთდება ერთი მთავარი მიზნისთვის - გავზარდოთ დასაქმება და ეს ხაზი ასახულია ყველა ჩვენს პოლიტიკურ გადაწყვეტილებაში, დაწყებული განათლების რეფორმით და დამთვარებული თუნდაც მასობრივი პრივატიზებით", — განაცხადა ეკონომიკისა და მდგრადი განვითარების მინისტრმა.

იუსტიციის მინისტრის, თეა წულუკიანის თქმით, ინტერვიუმ მთლიანად აჩვენა, ვინ არის ბიძინა ივანიშვილი. განცხადებაში მინისტრი ხაზს უსვამს იმას, რომ ივანიშვილს პირადი ინტერესები არ აქვს, არამედ, მისთვის მთავარია, "ქართული სახელმწიფოს სწრაფი განვითარება"

"დროა, რომ პარტიებმა არჩევნებზე იზრუნონ და ვერანაირი ხელშეშლა ვერც მთავრობის და ვერც პარლამენტის ფუნქციონირებაში ეფექტური ვერ იქნება. რაც მალე გავიგებთ ამას ყველა ერთად, რა თქმა უნდა, ეს ქვეყნისთვის იქნება უკეთესი", — განაცხადა თეა წულუკიანმა.

ივანიშვილის ინტერვიუ შეაფასეს საპარლამენტო უმრავლესობის წარმომადგენლებმაც. მთავრობის წევრების მსგავსად, მათაც საერთო, თუმცა განსხვავებული მესიჯბოქსი ჰქონდათ, კერძოდ, პოლიტიკური ოპოზიციის, ნაციონალული მოძრაობის კრიტიკა, ინტერვიუს კონტექსტში.

ვიცე-სპიკერმა გია ვოლსკიმ ინტერვიუს იმ ნაწილზე გაამახვილა ყურადღება, სადაც ივანიშვილი ამბობს, რომ ნაციონალურ მოძრაობას რეალურად გადატრიალება სურს:

"ნებისმიერ ვითარებაში, როცა გულზე მჯიღს ირტყამენ და ამბობენ, რომ მათი პოპულარობა დღითიდღე იზრდება, თუნდაც ამ ლიდერების, რომლებიც ერთად გაერთიანდნენ, რატომაც არა, გამოვიდნენ არჩევნებში და მიიღონ მონაწილეობა. მაგრამ მათ არჩევნები არ უნდათ, მათ უნდათ ის რევოლუციური რეჟიმი, რომელსაც სააკაშვილი 2014 წლიდან აანონსებდა, შეიძლება უფრო ადრეც".

პარლამენტის გადამდგარმა თავმჯდომარემ და ქართული ოცნების ლიდერმა, ირაკლი კობახიძემ თქვა, რომ ბიძინა ივანიშვილმა ნაცონალური მოძრაობა "სარკეში ჩაახედა":

"სურათი აბსოლუტურად ზუსტად იყო წარმოჩენილი, სწორედ ამიტომ ვისმენდით ჩვენ გუშინ მთელი დღის განმავლობაში და დღეს დილიდან ნაცმოძრაობის წარმომადგენლების ნერვიულ კომენტარებს. მათ ჩაიხედეს სარკეში! ეს იყო ბიძინა ივანიშვილის ინტერვიუ".