რამდენიმე დღის წინ Amazon-მა ახალი მოწყობილობა დააპატენტა - დამხმარე დრონი პოლიციელებისთვის.

პატენტის მიხედვით, დრონის მართვა ხმოვანი ბრძანებებით იქნება შესაძლებელი. მოწყობილობა რაციის მიკროფონზე მოთავსდება, ოფიცერს კი ექნება საშუალება დრონს ჰაერში აფრენის და ერთ ადგილზე გაჩერების ბრძანება მისცეს, რა დროსაც რობოტი კამერის ფუნქციას შეასრულებს, ან გაყოლა უბრძანოს, ამ შემთხვევაში დრონი პოლიციელის ახლოს იტრიალებს და გარემოს გადაიღებს.

ფოტო: Amazon

"მფრინავი პოლიციელის" ფუნქციები ამითი არ ამოიწურება. ის გამოსადეგი იქნება დევნისასაც, მაგალითად, ოფიცერს შეეძლება დრონს უბრძანოს, რომ გაქცეულ დამნაშავეს გაჰყვეს, ხოლო თავად გადაუხვიოს და ეცადოს დამნაშავეს გზა მოუჭრას. ასევე გათვალისწინებულია ორი დამნაშავის სცენარიც - დრონი ერთს გაეკიდება, პოლიციელი კი მეორეს.

პატენტში მოწყობილობის ძირითად ფუნქციას პოლიციური საქმიანობა წარმოადგენს, თუმცა ამაზონში სჯერათ, რომ დრონის გამოყენება სხვა მიზნებისთვისაც შეიძლება, მაგალითად, სამხედროები შეძლებენ შენობის დაზვერვას, ხოლო ჩვეულებრივი მოქალაქეები თავიანთი მანქანის დიდ პარკინგებზე პოვნას და ა.შ.