ჰონგ-კონგის რაიონული საბჭოების არჩევნებში პროდემოკრატიული ძალები იმარჯვებენ. წინასწარი მონაცემებით, ოპოზიციონერებმა საბჭოებში 452-დან 278 ადგილი მოიპოვეს. მანამდე სახელისუფლებო ბლოკები ადგილების თითქმის 75 პროცენტს აკონტროლებდნენ.

24 ნოემბერს ამომრჩეველთა აქტივობამ 71 პროცენტი შეადგინა მაშინ, როცა 2015 წელს მხოლოდ 47 პროცენტი იყო. ჰონგ-კონგში არჩევნებს ისტორიულს უწოდებენ, რადგან აქამდე პეკინი და მთავრობა აცხადებდა, რომ მოსახლეობის უმრავლესობა მათ უჭერდა მხარს.

არჩევნებში რამდენიმე ცნობილი ჰონგ-კონგელი პოლიტიკოსი იღებდა მონაწილეობა. ადგილობრივი მედიის ინფორმაციით, აქტივისტმა ჯიმი შამმა, რომელიც საპროტესტო დემონსტრაციების ერთ-ერთ ორგანიზატორად მიიჩნევა, მანდატი მოიპოვა.

ჰონგ-კონგი 18 რაიონისაგან შედგება, თითოეულში კი რაიონული საბჭოა. საბჭოები ძირითადად ადგილობრივ საკითხებზე მუშაობს — გზების შეკეთება, ინფრასტრუქტურის განვითარება და ა.შ. რეგიონული დონის გადაწყვეტილებებში საბჭოების გავლენა მცირეა.

ჰონგ-კონგის საკანონმდებლო ორგანოში, რომლის არჩევნები 2020-შია, 70 ადგილიდან საბჭოების წევრები მხოლოდ 6-ს იკავებენ. გარდა ამისა, საბჭოების წევრები ჰონგ-კონგის ადმინისტრაციის ხელმძღვანელის არჩევაში იღებენ მონაწილეობას.

გაიგეთ მეტი: