წარმატებული დებიუტის შემდეგ, Warner Bros. ტოდ ფილიპსის Joker-ის სიქველს უკვე გეგმავს. მოლაპარაკებები მიმდინარეობს მთავარი როლის შემსრულებელ ხოაკინ ფენიქსთან და რეჟისორ ტოდ ფილიპსთან.

ფილმისთვის სცენარს, ისევე როგორც პირველი ნაწილისთვის, კვლავ სკოტ სილვერი დაწერს. The Hollywood Reporter-ის ინფორმაციით, ფილიპსმა Warner Bros.-თან სიქველზე მოლაპარაკებები ფილმის გამოსვლიდან რამდენიმე დღეში დაიწყო. თუმცა Deadline-ის წყარო ამ ეტაპზე რამე შეთანხმების არსებობას უარყოფს.

გამოსვლის პირველ შაბათ-კვირას, ორ დღეში ჯოკერის ბოქს ოფისმა $96,2 მილიონს მიაღწია, ერთ კვირაში კი — $234 მილიონს. ნოემბერში ფილმის შემოსავალმა მილიარდ დოლარს გადააჭარბა და დედპულის რეკორდი გააუმჯობესა. ჯოკერის პრემიერა 2 ოქტომბერს შედგა.

თუ გავიხსენებთ იმას, რომ ფილმის ბიუჯეტი $62,5 მილიონი იყო, მაშინ ჯოკერი ერთ-ერთ ყველაზე წარმატებულ და ფინანსურად მომგებიან პროდუქტად შეგვიძლია შევაფასოთ. თანაც ეს ყველაფერი იმის გათვალისწინებით, რომ ფილმს ჯერ კიდევ პრემიერამდე აკრიტიკებდნენ საფრთხის შემცველი შინაარსობრივი დეტალების გამო.