ავსტრალიაში მძვინვარე ხანძრის გამო ადგილობრივი მოსახლეობა შიშველი ხელებითაც კი ცდილობს, რომ ცხოველები საფრთხეს გაარიდოს. მაგალითად, სულ ცოტა ხნის წინ გავრცელდა ვიდეო, რომელშიც კარგად ჩანს, თუ როგორ გამოიყვანა ავსტრალიელმა ტონი დოერტიმ კოალა ცეცხლმოკიდებული ტყიდან.

კოალები ხანძრის დროს ხეზე აცოცებას ცდილობენ, რათა სიცხეს თავი დააღწიონ, თუმცა ხშირ შემთხვევაში ასე უფრო დიდ საფრთხეში იგდებენ თავს.

ავსტრალიაში ბოლო დღეებში ტემპერატურამ 40 გრადუს ცელსიუს მიაღწია, რამაც ხანძრების გაჩენას შეუწყო ხელი და უკვე მილიონ ჰექტარზე მეტი მოცულობის ტყე დაიწვა.

ხანძარი განსაკუთრებულ საფრთხეს ცხოველების ენდემურ სახეობებს უქმნის, რომლებიც ისედაც გადაშენების პირას არიან. მაგალითად, ხანძრის გამო ბოლო დღეებში 350-ზე მეტი კოალა მოკვდა.

ფოტო: Reuters

ხანძრის დროს ცხოველებს განსაკუთრებულ პრობლემას გაუწყლოება უქმნის, ამიტომაც ადგილობრივებმა საქველმოქმედო კამპანია წამოიწყეს, რომლის ფარგლებშიც ავტომატურ მოწყობილობებს ამონტაჟებენ, რაც ცხოველებს წყურვილის მარტივად მოკვლაში დაეხმარება.

აღნიშნულ ვიდეოშიც გმირი ქალი პირველ რიგში დაზიანებულ კოალას სწორედ წყალს აწვდის. როგორც აღმოჩნდა, გადარჩენილი კოალა 14 წლისაა და მას კიდურებთან ერთად სხეულის უმეტესი ნაწილიც დამწვარი აქვს. თუმცა, როგორც ის კლინიკა იტყობინება, სადაც ამჟამად მას უვლიან, უკვე მშვიდადაა და ბედნიერად შეექცევა ევკალიპტის ფოთლებს.