თბილისის საქალაქო სასამართლოში 18 ნოემბერს დაკავებულების საქმეებზე ვიდეომტკიცებულებებს იკვლევენ. შსს-ს წარმომადგენლები აპელირებენ იმაზე, რომ ბრალდებულები იგინებოდნენ დაკავების დროს, რა დროსაც დარბაზში დამსწრე წამოდგა და მოსამართლეს განუცხადა, რომ თავადაც იგინებოდა აქციაზე და ისიც დააკავონ.

"მეც ვიყავი და მეც ვიგინებოდი, შს მინისტრსაც შევაგინე, პრემიერსაც შევაგინე. სამართლიან გადაწყვეტილებას თუ არ მიიღებთ, საღამოს თქვენც შეგაგინებთ", — თქვა დარბაზში დამსწრემ, რის შემდეგაც ის გააძევეს.

მის სიტყვით გამოსვლას სხვა დამსწრე პირის ტაში მოჰყვა და მოსამართლემ ისიც გააგდო.

გარდა ამისა, შსს-ს ვიდეოკადრი იყო ამობრუნებული, რასაც დარბაზში მყოფების სიცილი მოჰყვა. ბრალდებულმა ბექა ბასიალიამ ხუმრობით თქვა, მთლიანად ეკრანი ხომ არ ამოეტრიალებინათ, რასაც, ასევე, სიცილი მოჰყვა და დამსწრე ნინო დანელია დარბაზიდან გააძევეს.

სხდომა გუშინ, 19 ნოემბერს მიმდინარეობდა, თუმცა, გადაიდო. ყველა დაკავებულის საქმე ერთ მოსამართლე ვალერიან ფილიაშვილს აქვს ჩაბარებული. მან დღეს მხოლოდ 20-ის დაკავებულის საქმის ნაწილობრივ განხილვა შეძლო. ჯერ უცნობია, დააკისრებს თუ არა ის რომელიმე მათგანს ჯარიმას, თუ დატოვებს პატიმრობაში.