ევროპული საქართველოს დეპუტატი, სერგო რატიანი აცხადებს, რომ მოსამართლემ დარბაზიდან გაღიმების გამო გააგდო. ამის შესახებ მან თბილისის საქალაქო სასამართლოში განაცხადა, სადაც 18 ნოემბერს დაკავებული 37 პირის საქმის განხილვა მიმდინარეობს.

რატიანი ამბობს, რომ არ გასცინებია, უბრალოდ ვითარების გამო გაეღიმა.

"გამეღიმა იმაზე, რომ ჩემ წინ ერთ-ერთი გააძევეს იმის გამო, რომ ტაში დაუკრა. ღიმილის გამო გაშვება არ მინახავს, არც ტაშის გამო მინახავს. ამაზე მძიმე სხდომები ყოფილა და ელემენტარულის გამო, არა", — თქვა რატიანმა.

სხდომა გუშინ, 19 ნოემბერს მიმდინარეობდა, თუმცა, გადაიდო. ყველა დაკავებულის საქმე ერთ მოსამართლე ვალერიან ფილიაშვილს აქვს ჩაბარებული. მან დღეს მხოლოდ 20-ის დაკავებულის საქმის ნაწილობრივ განხილვა შეძლო. ჯერ უცნობია, დააკისრებს თუ არა ის რომელიმე მათგანს ჯარიმას, თუ დატოვებს პატიმრობაში.

ბოლო დღეების მოვლენები მოკლედ

ამჟამად პარლამენტის შენობა ბლოკირებული აღარ არის. აქციის მონაწილეები ამბობდნენ, რომ არ შეუშვებდნენ არც ერთ დეპუტატს. შესასვლელებში გაშლილი იყო კარვები და დააწყეს ტომრები, ევროპულმა საქართველომ ყველა შესასვლელ ჭიშკარს სიმბოლურად ბოქლომი დაადო.

ასევე, პიკეტი მოხსნეს პარლამენტის შესასვლელებს. აქციის დაშლისას მინიმუმ 37 ადამიანი დააკავეს. ამ ოპერაციის შემდეგ დეპუტატები პარლამენტში შევიდნენ და ბიუროს სხდომა გამართეს.

აქცია თბილისის ქუჩებში მას შემდეგ იმართება, რაც ბიძინა ივანიშვილის დაპირება არ შესრულდა. მმართველმა პარტიამ ჩააგდო საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო. მმართველი პარტიის ამ გადაწყვეტილებამ ოპოზიციური პარტიები საერთო მოთხოვნის ირგვლივ გააერთიანა. მოთხოვნას იზიარებენ სამოქალაქო სექტორის წარმომადგენლები და მოძრაობა ქვეყნის სამსახურში.