#სირცხვილიას ლიდერი, შოთა დიღმელაშვილი ამბობს, რომ ორშაბათს, 25 ნოემბერს პარლამენტის პიკეტირება ისევ იგეგმება. აქციის მონაწილეებს ის საღამოს 7 საათზე შეკრებისკენ მოუწოდებს. ამის შესახებ მან აქციაზე სიტყვით გამოსვლის დროს თქვა.

"ჩვენი მტერი ხართ თქვენ, ბიძინა ივანიშვილო და მივაღწევთ იმას, რომ ამ ქვეყანაში ვეღარ მართოთ ხელისუფლების ვერც ერთი შტო და რამდენიც არ უნდა გვარბიოთ, მაინც ამოგთხრით... ვერ მოგვაყრით მიწას, ვერ დაგვამარცხებთ... გაგვწევთ, მაგრამ მაინც მოვალთ, ვერ დაგვამარცხებთ და თქვენ აღარ დაგრჩებათ სხვა საზრუნავი, გარდა იმისა, რომ უზრუნველყოთ თქვენი დებილი დეპუტატების შეყვანა პარლამენტში", — თქვა დიღმელაშვილმა.

მისი თქმით, მოქალაქეებს ოპოზიციური პარტიები მიმდინარე კვირის სამოქემდო გეგმებს თავად გააცნობენ, მოძრაობა #სირცხვილია კი თბილისის გარეთ დაგეგმილ აქტივობებს აუქმებს.

"ჩვენ გვეგონა, რომ პროპორციული წესით არჩევნების ჩატარება უზრუნველყოფილი იყო, თუმცა, როგორც აღმოჩნდა, ჯერ ეს გვაქვს მოსაპოვებელი. ამას თბილისის გარდა ვერ მოვიპოვებთ ვერსაიდან. ესაა ეპიცენტრი, ესაა საჯილდაო ქვა, მაგრამ გვჭირდება თქვენი დახმარება. ჩვენ ვერ ჩამოვედით თქვენთან, მაგრამ თქვენ ჩამოდით ჩვენთან", — თქვა დიღმელაშვილმა.

ბოლო დღეების მოვლენები მოკლედ

ამჟამად პარლამენტის შენობა ბლოკირებული აღარ არის. აქციის მონაწილეები ამბობდნენ, რომ არ შეუშვებდნენ არც ერთ დეპუტატს. შესასვლელებში გაშლილი იყო კარვები და დააწყეს ტომრები, ევროპულმა საქართველომ ყველა შესასვლელ ჭიშკარს სიმბოლურად ბოქლომი დაადო.

ასევე, პიკეტი მოხსნეს პარლამენტის შესასვლელებს. აქციის დაშლისას მინიმუმ 37 ადამიანი დააკავეს. ამ ოპერაციის შემდეგ დეპუტატები პარლამენტში შევიდნენ და ბიუროს სხდომა გამართეს.

აქცია თბილისის ქუჩებში მას შემდეგ იმართება, რაც ბიძინა ივანიშვილის დაპირება არ შესრულდა. მმართველმა პარტიამ ჩააგდო საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო. მმართველი პარტიის ამ გადაწყვეტილებამ ოპოზიციური პარტიები საერთო მოთხოვნის ირგვლივ გააერთიანა. მოთხოვნას იზიარებენ სამოქალაქო სექტორის წარმომადგენლები და მოძრაობა ქვეყნის სამსახურში.