პრემიერ-მინისტრი, გიორგი გახარია აცხადებს, რომ იმ შემთხვევაში, თუ "უპასუხისმგებლო პოლიტიკოსები" კვლავ მოახდენენ პარლამენტის ბლოკირებას, პოლიცია გააკეთებს იგივეს. ასე გამოეხმაურა ის გუშინდელი აქციის დაშლას.

მისი თქმით, პოლიციამ კანონის ფარგლებში იმოქმედა.

"ბლოკირების შემდეგ პარლამენტის ფუნქციონირება პირადაპირ დადგა კითხვის ნიშნის ქვეშ, პარლამენტი ნახევარი დღის განმავლობაში ვერ ფუნქციონირებდა. ფაქტობრივად, თავს დაესხნენ დეპუტატებს. რა თქმა უნდა, ასეთ შემთხვევაში პოლიციამ და მთავრობამ მიიღო გადაწყვეტილება, რომლის უფლებაც ჰქონდა", — თქვა მან.

ბოლო დღეების მოვლენები მოკლედ

ამჟამად პარლამენტის შენობა ბლოკირებული აღარ არის. აქციის მონაწილეები ამბობდნენ, რომ არ შეუშვებდნენ არც ერთ დეპუტატს. შესასვლელებში გაშლილი იყო კარვები და დააწყეს ტომრები, ევროპულმა საქართველომ ყველა შესასვლელ ჭიშკარს სიმბოლურად ბოქლომი დაადო.

სპეცრაზმმა აქცია დაშალა და პიკეტი მოხსნა პარლამენტის შესასვლელებს. აქციის დაშლისას მინიმუმ 18 ადამიანი დააკავეს. ამ ოპერაციის შემდეგ დეპუტატები პარლამენტში შევიდნენ და ბიუროს სხდომა გამართეს.

აქცია თბილისის ქუჩებში მას შემდეგ იმართება, რაც ბიძინა ივანიშვილის დაპირება არ შესრულდა. მმართველმა პარტიამ ჩააგდო საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო. მმართველი პარტიის ამ გადაწყვეტილებამ ოპოზიციური პარტიები საერთო მოთხოვნის ირგვლივ გააერთიანა. მოთხოვნას იზიარებენ სამოქალაქო სექტორის წარმომადგენლები და მოძრაობა ქვეყნის სამსახურში.