ევროპული საქათველოს ლიდერი გიგა ბოკერია აცხადებს, რომ არ გაჰკვირვებია ქართული ოცნების გენერალური მდივნის, კახა კალაძის განცხადება იმის შესახებ, რომ აქციაზე მხოლოდ ნაციონალური მოძრაობა დგას. მისი თქმით, ეს ოცნების სტრატეგიაა, რომ ამომრჩევლებში ოპონენტების წრე შეამცირონ.

ბოკერიას თქმით, კალაძემ ივანიშვილის "უტიფრობა" გაიმეორა, რაც, ასევე, არ არის გასაკვირი, რადგან ის ყოველთვის ასე იქცევა.

"კალაძე აქამდეც გამოირჩეოდა უტიფრობით, კონკურენციაში იყო ივანიშვილთან. არადა დიდი კონკურენციაა ივანიშვილის გუნდში უტიფრობასა და საზოგადოების შეურაცხყოფაში", —განაცხადა ბოკერიამ On.ge-სთან საუბრისას.

თბილისის მერმა, კახა კალაძემ 18 ნოემბრის ბრიფინგზე განაცხადა, რომ პარლამენტის წინ მიმდინარე აქცია, რომელშიც სხვადასხვა ოპოზიციური პარტია და სამოქალაქო მოძრაობა იღებს მონაწილეობა, მთლიანად ნაციონალური მოძრაობის ორგანიზებულია.

ამასთანავე, კალაძემ აღნიშნა, რომ ოპოზიციის მხრიდან "დესტრუქციის" გაგრძელების შემთხვევაში ხელისუფლებას ექნება შესაბამისი რეაგირება.

ამჟამად პარლამენტის შენობა ბლოკირებულია. აქციის მონაწილეები ამბობენ, რომ არ შეუშვებენ არც ერთ დეპუტატს. შესასვლელებში გაიშალა კარვები და ჩააწყვეს ქვიშის ტომრები, ევროპულმა საქართველომ ყველა შესასვლელ ჭიშკარს სიმბოლურად ბოქლომი დაადო.

აქცია თბილისის ცენტრალურ ქუჩებში მას შემდეგ იმართება, რაც ბიძინა ივანიშვილის დაპირება არ შესრულდა. მმართველმა პარტიამ ჩააგდო საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო. მმართველი პარტიის ამ გადაწყვეტილებამ ოპოზიციური პარტიები საერთო მოთხოვნის ირგვლივ გააერთიანა. მოთხოვნას იზიარებენ სამოქალაქო სექტორის წარმომადგენლები და მოძრაობა #სირცხვილია.