ქართული ოცნების დეპუტატი, აკაკი ზოიძე 16 ნოემბრის უმრავლესობის სხდომის შემდეგ ამბობს, რომ გულდაწყვეტილია საკონსტიტუციო ცვლილებების ჩაგდებით.

"მიმაჩნია, რომ საერთო პასუხისმგებლობაა, მიუხედავად იმისა, რომ კოლეგებმა მივეცით ხმა იმ დაპირების შესრულებას რაც გავეცით",— ამბობს ზოიძე და აგრძელებს იმით, რომ დრო და პაუზა სჭირდება გადასაფასებლად და დასაფიქრებლად, არგუმენტებისა და სიტუაციის გასააზრებლად.

"არც ერთ შემთხვევაში მე არ მივიღებ გადაწყვეტილებას, რომელიც დააზიანებს ქართული ოცნების ფასეულობებსა და ღირებულებებს, რითაც ჩვენ მოვედით და ასევე იმ თანაგუნდელებს, რომლებიც ერთგული არიან ამ ღირებულების. გადაწყვეტილება ამ მიმართულებით არ იქნება. პაუზა ეს არის, რომ მე უნდა ავიღო და დავფიქრდე. ერთადერთი რაც დასკვნა გამოვიტანე ჩემს თავში არის ის, რომ პრაგმატული პოლიტიკა გონებით მესმის, მაგრამ როგორც ჩანს გულით არა", — ამბობს დეპუტატი.

პარლამენტმა საკონსტიტუციო ცვლილებები ჩააგდო და 2020 წელს არჩევნები პროპორციული სისტემით აღარ გაიმართება. კანონპროექტის მისაღებას 113 ხმა იყო საჭირო, თუმცა 101 მიიღო. 3 დეპუტატი კანონპროექტის წინააღმდეგი იყო, სხვებმა კი თავი შეიკავეს.

ამის გამო უმრავლესობა ჯამში 11-მა დეპუტატმა დატოვა. ესენი არიან: თამარ ჩუგოშვილი, თამარ ხულორდავა, სოფიო ქაცარავა, გიორგი მოსიძე, დიმიტრი ცქიტიშვილი, ზაზა ხუციშვილი, მარიამ ჯაში, გიორგი ბეგაძე, ზვიად ძიძიგური, ნინო გოგუაძე, გიგა ბუკია.