რუსულ ტელეარხ Russia Today-ს, რომელიც რუსეთის ფედერაციის ხელისუფლების მიერაა შექმნილი და დაფინანსებული, ბრიტანეთში The National Westminster Bank-მა ანგარიშები დაუხურა. ამის შესახებ ინფორმაციას რუსული ტელეარხის მთავარი რედაქტორი, მარგარიტა სიმონიანი წერს ტვიტერზე:

"ჩვენ ყველა ანგარიში დაგვიხურეს ბრიტანეთში. ყველა ანგარიში. "გადაწყვეტილება არ გადაიხედება". გაუმარჯოს სიტყვის თავისუფლებას!"

The National Westminster Bank არის ბრიტანეთის ერთ-ერთი ყველაზე მსხვილი საბანკო ჯგუფის, Royal Bank of Scotland Group-ის წევრი, შესაბამისად, რაშა თუდეის ამ ჯგუფში შემავალი სხვა ბანკებიც არ მოემსახურებიან.

ფაქტს უკვე გამოეხმაურა რუსეთის ხელისუფლება. რუსეთის საგარეო საქმეთა სამინისტროს პრესსპიკერმა, მარია ზახაროვამ ასევე ტვიტერზე დაპოსტა, რომ "როგორც ჩანს, დიდმა ბრიტანეთმა ევროკავშირიდან გასვლამდე სიტყვის თავისუფლების დაცვის ვალდებულება დატოვა ევროპაში. როგორც იტყვიან, ახალ ცხოვრებაში მავნე ჩვევების გარეშე".

რაშა თუდეი რუსეთის ხელისუფლებამ შექმნა მსოფლიოში ალტერნატიული ინფორმაციის გასავრცელებლად, რათა დაუპირისპირდეს დასავლურ მედიას. მიუხედავად ფინანსური კრიზისისა, რუსეთის ხელისუფლება აღნიშნულ ტელეარხს დაფინანსებას მუდმივად უზრდის. როგორც რაშა თუდეი აცხადებს, ის მსოფლიოს 700 მილიონი მოსახლისთვისაა ხელმისაწვდომი.