ერთიანი ნაციონალური მოძრაობის ვაკის მაჟორიტარი დეპუტატობის კანდიდატი ელენე ხოშტარია შინაგან საქმეთა სამინისტროს განცხადებას, რომელიც გივი თარგამაძის ავტომობილის აფეთქებას უკავშირდება, არადამაჯერებელს უწოდებს:

"ზოგადად, ამ საქმესთან დაკავშირებით ჩვენ ვიხილეთ როგორი უპასუხისმგებლო და ამორალური იყო ხელისუფლება, რომელიც უმაღლესი პოლიტიკური დონიდან აკეთებდა სამარცხვინო მინიშნებებს უკრაინასთან და რაღაცებთან დაკავშირებით. ისევე როგორც წლების წინ, ხელისუფლებამ ისპეკულირა ბარბარე რაფალიანცის საქმით და კითხვებზე პასუხი არ გაუცია, ახლაც შეეცადა იგივეს გაკეთებას. შესაბამისად, ჩვენ რა თქმა უნდა, ამ გამოძიების მიმართ ნდობა არ გვაქვს".

დღეს შსს-მ გივი თარგამაძის მანქანის აფეთქების საქმეზე ახალი დეტალები გაასაჯაროვა. უწყების ინფორმაციით, ავტომანქანის უკანა მარცხენა ფრთიდან აღებული ბიოლოგიური მასალიდან გამოყვანილი გენეტიკური პროფილი, იმ ბრალდებული პირის მშობლების გენეტიკური პროფილების იდენტურია, რომლის კვალს ჯერ ვერ მიაკვლიეს.

4 ოქტომბერს, თბილისში, კოლმეურნეობის მოედნის მიმდებარე ტერიტორიაზე ნაციონალური მოძრაობის წევრის, გივი თარგამაძის მანქანა ააფეთქეს. დაზიანდა მიმდებარე შენობები, ასევე ახლომდებარე ავტომობილები, დაშავდნენ გამვლელები. ჯანდაცვის მინისტრის ინფორმაციით, მანქანის აფეთქებისას დაშავებულთა რიცხვი ხუთია. მათგან ერთ-ერთს საავადმყოფოში ოპერაცია ჩაუტარდა.