სან-ფრანცისკოში ვიზიტისას თვალში აუცილებლად მოგხვდებათ უზარმაზარი ნახატებით დაფარული შენობები: აქ ნახავთ ფრიდა კალოს, რობინ უილიამს, ჯორჯ ვაშინგტონს და ა.შ. მომავალი სამშაბათისთვის კი ამ სიას კიდევ ერთი სახელი შეემატება: გრეტა თუნბერგი.

თინეიჯერი აქტივისტის პორტრეტზე მხატვარი ანდრეშ პეტრესელი მუშაობს. მისი აზრით, გრეტა მთელი სამყაროსთვის მაგალითია:

"ჩვენ მასობრივი გადაშენების დასაწყისს ვუყურებთ და თუ ახლა არაფერს გავაკეთებთ, ცოტა ხანში გვიანი იქნება", - ამბობს ის.

ადგილობრივების მხრიდან გამოხმაურება უმეტესად პოზიტიური იყო, თუმცა კედლის მხატვრობამ იმ ადამიანების დაბნეულობა გამოიწვია, ვინც გრეტა თუნბერგს სახეზე ვერ ცნობს:

პროექტს Oneatmosphere.org აფინანსებს - არასამთავრობო ორგანიზაცია, რომელიც ეკოლოგიის კუთხით მომუშავე ადამიანების პოპულარიზაციას ეწევა.

ეს პირველი შემთხვევა არაა, როცა გრეტა კედლის მხატვრობის ინსპირაცია გახდა. ეს უზარმაზარი ნახატი ბრისტოლის ერთ-ერთ კორპუსზე შეგიძლიათ იხილოთ.