ადამიანის უფლებების სწავლებისა და მონიტორინგის ცენტრი გუშინდელი, 8 ნოემბრის ძალადობრივი აქციის ორგანიზატორების, ქართული მარშისა და ლევან ვასაძის დაკავებას მოითხოვს. ორგანიზაციამ ამ მოთხოვნებით განცხადება დღეს, 9 ნოემბერს გაავრცელა, როცა კვლავ იგეგმება ძალადობრივი აქცია.

ადამიანის უფლებებზე მომუშავე ორგანიზაცია მიიჩნევს, რომ ეს პირები არღვევენ სამოქალაქო მშვიდობას და უსაფრთხოებას და სასიცოცხლო რისკების წინაშე აყენებს არა ერთ სოციალურ ჯგუფს, განსაკუთრებით ლგბტი ადამიანებს.

"8 ნოემბრის მოვლენები კიდევ ერთხელ აჩვენებს ჩვენს საზოგადოებაში მზარდ ჰომოფობიას და მის პოლიტიკურ ინსტრუმენტალიზებას, რაც პირველ რიგში ლგბტი ადამიანებს აზიანებს და მათ უსაფრთხოების მაღალ რისკებს უქმნის. ეს საგანგაშო მდგომარეობა სახელმწიფოს აკისრებს ვალდებულობას მიიღოს ეფექტიანი ზომები ჰომოფობიის შესამცირებლად. თუმცა, რაიმე მცდელობები ხელისუფლების მხრიდან ამ მიმართულებით არ ჩანს. მეტიც, ზოგიერთ შემთხვევაში თავად ხელისუფლების მხრიდან ჩანს ჰომოფობიის პოლიტიკური გამოყენების პრაქტიკა", — ვკითხულობთ განცხადებაში.

ბოლო რამდენიმე დღე ძალადობრივი ორგანიზაციები და ლიდერები ანტილიბერალურ აქციას აორგანიზებდნენ. მათი ორგანიზებით, ასეთი აქცია გაიმართა 8 ნოემბერს კინოთეატრ ამირანთან, სადაც ქართულ-შვედირი გეი დრამის კინოჩვენება იყო. ფილმის საყურებლად შესულ ადამიანებს აყენებდნენ ფიზიკურ და სიტყვიერ შეურაცხყოფას.